Lockdown thawh lina kalpui leh a ni dawn

India ram pumah inkharkhip thawh lina (lockdown 4.0) kalpui a ni leh dawn tih Prime Minister chuan a sawi a, hetah hian inkaihhruaina dân thar a awm dawn tih sawiin, inkaihhruaina dan thar hi May ni 18 hmaa puanzar a nih tur thu a sawi.

Prime Minister, Narendra Modi hian nizan hmasa khan ram mipuite hnena thuchah sawiin he thu hi a sawi a, Prime Minister chuan lockdown thawh li-na chu State hrang hrangte rawtna neih atangin inkaihhruaina pawh siam a ni dawn tih a sawi a. Virus pakhatin khawvel a chawkbuai nasa tih sawiin, tunah chuan mahni sahimna zawngin mitinin indona angin he buaina thleng hi an hmachhawn mek a, he indona atanga kan him dan kawng hi zawn a ngai a ni tiin, COVID-19 hian min chhuahsan lawk dawn lova, min chamchilh rih dawn a, mahse he hri leng laka him hi kan tum tur a ni a, kan tumah kan chian a tul a ni, a ti bawk.

He harsatna thleng mek hian mahni intodel a tulzia min zirtir thu leh chu chu he hri (coronavirus)-in thuchah a rawn ken chu a ni tih Prime Minister chuan a sawi a, Coronavirus len hma-in India chuan PPE leh N95 Mask te hi a siam lo tih sawiin, tunah chuan India ramah hengte hi nitin nuai 2 siamchhuah mek a ni tawh a, he harsatna lo thlengah hian remchanna lak thiam a tul thu leh, he hri len hmaa khawvelin intodelna awmzia a hriat dan leh tuna kan hriat dan chu a danglam chho mek a ni, a ti bawk.

Prime Minister chuan kum zabi 21-na hi India kum zabi tiin sawi a ni thin a, ODF, TB leh zeng hri umbo kawnga India hlawhtlinna te khawvel in a hria a, heng vang hian khawvelin India a chhoh en a, khawvel in India-ah rinna a nghat a ni, a ti a, khawvela India dinhmun chu a sang zel tih sawiin, India chu a intodelh dawn thu leh intodelhna turin innghahna tur ban (pillar) panga - Economy, Infrastructure, System, Demography leh Demand-te a awm tih a sawi a. Ramchhunga harsatna thleng thei venna atana Economic Package cheng vbc. nuai 20 chu kalpui a nih dawn thu leh, he package hi loneitute leh hnathawktute tan a ni dawn tih a sawi a, he package chungchang kimchang zawk chu nimin lamah Finance Minister-in a puan tur thu a sawi bawk.

Prime Minister chuan Economic package chuan ram dinhmun a siamthat theih tur thu sawiin, he harsatna thleng mekah hian tualchhunga mamawh inphuhruk tawnna pawimawhzia a lang tih a sawi a, tualchhung thil tharchhuah ngaihsan a tul tih sawiin, khawvel puma thil siamchhuaktute pawh tualchhung atanga intan vek an ni tih a sawi a, ramchhung mipuite chu mahni tualchhung thil siamchhuah lei uar tura chahin, kan mawhphurhna chu mahni dinhmun siamthat tum a ni a, intodelh turin mitinin mawh-phurhna kan neih a, tumna thar nena hmalam kan pan a tul a ni, a ti bawk.