Quarantine Facility tlawh

Health & Family Welfare Minister Dr. R. Lalthangliana leh Home Department leh Disaster Management & Rehabilitation Minister ni bawk, Lalchamliana te chuan nimin khan Aizawl khawpui chhunga Quarantine Facility pali – Youth Hostel, Luangmual, Tourist Lodge, Chaltlang, NIELIT, Zuangtui leh R. Dengthuama Hall, Mualpui te an tlawh a, Quarantine Facility viltute nen in kawmin an dinhmun leh hmalak dan te an enfiah.
Quarantine Facility hrang hrang an tlawhna ah hian Health Minister Dr. R. Lalthang-liana chuan Mizoram mi leh sa state pawna tangkhang rawn haw tur hi a tira hisap aiin an tam tak avangin Quarantine Facility ruahman pawh a hautak hle tih a sawi a. Mizorama rawn haw turte hi a tahtawlin hruai haw an ngai dawn tih sawiin, “Kan insengluh kim a quarantine an zawh-fel vek hnuah kan dinhmun dik tak a hriatchian theih dawn a, hemi chhung hian mipuite kan fimkhur lehzual a ngai rih dawn a ni,” a ti a. Tunah hian Mizoram-ah positive case kan nei rihlo a a lan avang hian kan thla a muang sual ang tih a hlauhawm tih sawiin, Hotspot kan tih mai, COVID-19 vei tamna hmun atanga Mizorama rawn haw tur an tam a, kan fimkhur hle a tul a ni, a ti bawk.
DM&R Minister, Lalchamliana pawhin Mizoram mi tangkhang te hruaihaw hi a hautak dawn tih sawiin, Rapid Antibody Test kit hi pakhat Rs. 700/- man a nih thu leh mi pakhat tan vawihnih test zel a ngai dawn tih a sawi a, quarantine-a an awm ni 14 chhung hian mipakhat tan nitin ei leh in manah Rs. 300/- sen tur a nih bakah hian an mutbu leh mamawh thenkhat Towel, Toothbrush, Toothpaste etc., pek an ni bawk tih a sawi a, mi tlawmngai leh mi thilphalte zarah engemawchen harsatna tawk lovin kan la awm thei a ni, a ti bawk. Aizawl District ah hian Quarantine Facility 20 ruahman niin mi 1114 leng tura ruahman a ni.

Comments

Chhiar Hlawhte