Chanchin thar thenkhat :

Agriculture Development Board zinchhuak mek

COVID -19 hrileng avanga inkharkhip kalpui mek laiin kuthnathawktute mamawh leh an din-hmun zirchiang tur leh Agriculture Department hmalaknate puangzara zirtir turin Mizoram Agriculture Development Board member-te chu team hnih (2) ah inthenin Mizoram District–te an tlawh chhuak mek a. He Team pakhat hian Hnahthial an tlawh hnuah nimin khan Lunglei tlawh lehin Agriculture Department hnathawktu te leh Official dang te, tlawmngai pawlte leh Media mi te an kawm a. Lunglei District huamchhungah hian thingtlang Lo vah (Jhumming cultivation) kalpui mek chhungkaw 9436 awmin hengte hian ram 5962 hectare a zau ah Lo an nei mek a. COVID-19 hrilen hnuah Hectare 141.3 Chul rih niin Kawlbahra, Bal leh Pangbal te ching uar tura hmalak mek a ni tih he hunah hian tarlan a ni.

Rial vanga In chhia tam

Nimin zing khan Mizoram khawthlang lam Mamit District-a khaw pathum (3) te chu Rial in nasa takin a nuai a, In engemaw zat a chhia. Thudawn danin Rial tla hian Rengdil khuaah In 211 deng chhiain, In 91- te chu chhe zual a ni a. Zamuang khua-ah In 216 vel zet rial hian a deng chhe bawk a. In chhe zual hi In 82 a ni. Hei bakah hian Damdiai-ah In 27 deng chhia in, In 4 hi chhe zual a ni bawk. Heng chhiatna thlenna hmun hi nimin vek khan District thuneitute chuan tlawh nghalin chhawmdawlna awm thei ang ang an ngaihtuah sak nghal a ni.

Sum awm nia sawi sawifiah

Mizoram sawrkar Finance Department-a Economic Affairs Branch chuan COVID do nana hman theih mai sum tam tak (cheng vbc. 882.37) Sawrkarin nei anga ZPM Legislature Party Leader, Lalduhoma statement lang chu sawifiahin, heng sum hmuhna a sawi te hi a dik tlangpui tih an sawi a, sum tam tak pekchhuah a nih tawh avangin sum fai-a kawl teuh emaw, COVID do nana hman teuh tur emaw a awm hranlo tih an sawi.

Late Fee chawitir loh duh

ZPM Thalaite chuan Lockdown avanga Commercial Vehicle tam tak an din thuap lai leh lock-down zawh hnuah pawh Passenger 50% chauh phurh an phalsak laia, Commercial Vehicle neitute Late Fee chawitir an ni chu lirthei neitute tan thil hautak tak a ni tih an sawi a. Commercial Vehicles neitute ten harsatna an tawh hian mipui lamin an tuar ve zel avangin an harsatna hi hrethiama Late Fee hi chawi tir loh an duh thu an sawi.

White Paper chhuah phut

PRISM Party chuan Mizoram Chief Minister, Zoramthanga, Finance Minister ni bawkin Mizoram sum dinhmun dik tak a sawi theilo chu thil ni thei lo hulhûal leh zahthlâk tâwp a ni tih thuchhuah siamin an tarlang a. Kan sum dinhmun fiah taka sawi thei tur Finance Minister kan mamawh tak zetah an ngai tih sawiin, kan State sum hman dân chîang taka puan chhuahna (white paper) chhuah tùrin sawrkâr an phut bawk.

MPC in mualphothlak an ti

Chief Minister in Mizoram Sawrkar sum dinhmun a hriatloh thu a sawi hi MPC Party chuan Ram bungkhat hruaitu lu ber nihna chelhtlak a nih lohzia tilang chiangtu ah an ngai tih an sawi. Nimin-a thuchhuah an siamah MPC Party chuan May ni 12, 2020-a Zoram Mipuite hnena a thu-chah sawiah Chief Minister, Zoramthanga'n Hripui leng mek avanga Mizoram sum neihzat hriattheih a nihloh thu a sawi mai chuan kan ram leh Mipui enkawlna kawnga a mawhphurhna a zawh lohzia a tilangchiang hle ah an ngai tih sawiin, COVID-19 hripui len hma a ni emaw, len hnu a ni emaw, eng dinhmuna ding pawh ni ila Mizoram sawrkara sum lut leh chhuak hriatloh chhan chhuanlama Chief Minister in a hman hi thu tlingah an ngailo tih an sawi a. Chhungkaw pa ber in chhungkaw enkawl nana sum a neih leh neihloh a hrelo ang chauh mai dinhmuna CM a ding hi Mizo hnam ang pawhin a mualpho thlak an tih thu an sawi bawk.

Finance kian turin CM rawn

BJP Mizoram Pradesh in Chief Minister, Zoramthanga chu midang tana Finance Department kian turin an ngen bawk. BJP Mizoram Pradesh in nimin a thuchhuah an siamah Finance changtu Chief Minister in, “Mizoram sum din-hmun dik tak te, India ram sum dinhmun dik tak te, tuman a sawi theih loh, rinthu pawhin sawi a harsa, Pathian chauhin a hria,” tih a sawi chu mak an tih thu leh Pathian hming hial tul lova a lam tel chu Pathian pawi sawina lian takah an ngai tih an sawi a. Kum 10 lai Chief Minister term lo hmang zo tawh leh tuna Chief Minister term thumna hmang leh mek, Finance enkawltu hian Mizoram sum dinhmun chu, “Hei hi ka vaibel, hei hi ka kut zungpui,” tih khawpin Mizoram sum dinhmun leh Mizorama nitin-a Treasury-a pawisa che vel leh pawisa awm pawh hre vek tura ngaih anih laia hetiang thil a sawi ta mai hian Mizoram state Finance enkawl hna a tlin lohzia leh a ngaihna a hriat lohzia a ti lang chiang hle tih an tarlang.

CM Relief Fund dinhmun
 COVID-19 dona atan leh mi harsate tanpuina atan nimin thleng khan Chief Minister’s Relief Fund-ah Rs. 7,66,89,791/- a lut tawh a, heng sum lut atang hian Rs. 5,53,97,065/- chu hmanral ni tawhin tunah hian hmanbang Rs. 2,12,92,726 a la awm bawk a ni.