Lockdown pawhsei chhunga sawrkar thuchhuak hrang hrang leh a kenkawh dan turte sawiho a ni

Serchhip District Level Task Force on COVID-19 chu nimin khan an Chairman, Serchhip District Bawrhsap Dr. Lalzirmawia Chhangte, IAS hova thukhawmin, Lockdown pawhsei chhunga hnathawh dan tur sawrkar thuchhuak hrang hrang leh a kenkawh dan tur an sawiho.
Serchhip DC Meeting Hall-a Serchhip District Level Task Force on COVID-19 thutkhawm ah hian Ser-chhip District Bawrhsap chuan COVID-19 beihna kal zelah hmalakna dan tharte a lo chhuak zel tih sawiin, Dan hmanhmawh (Ordinance) te awmin, heng Dan te hi a kengkawhtuten tha taka an kalpui theih nan an hriatchian a tul thu a sawi a. Serchhip District chhunga hmalak tawhna ah mawhphurtuten tha taka hna an thawh thin avanga lawmthu sawiin, Police leh VLTF te an thawk tha tlang hle chu a lawm hle tih a sawi a. Tunhnaia State thenawma tangkhang lo haw te zingah Serchhip District mi 28 an lo haw tawh thu leh heng mite hi dan ang thlapa lo dawnsawna, khunghran mek an nih thu a sawi bawk.
He hunah hian Serchhip SP, R. Sathiyasundaram, IPS pawh The Mizoram (Containment and Prevention of COVID-19) Ordinance, 2020 kenkawhna kawng tinrengah leh Dan dang kenkawh kawngah engtiklai pawhin Police te chu biakpawh theih reng an nih thu a sawi a. Mipui punkhawmna thil pawimawh heng Gas lak, ni za inhlawh ang chi ah te Social Distancing kenkawh a tulna hmun apiangah Police te pun thin turin khawtlang hruaitute a sawm bawk.
Nimin-a Meeting-ah hian Lock-down pawhsei kalpui dan tura sawrkar dan ruahman te sawiho anih bakah Village Level Task Force te hnathawh zel dan tur chungchangte sawi a ni a. Village Task Force te hi Vawiin-ah kohkhawma an hmalak dan tur sawihona hun neihpui tura ruahman a ni bawk.
He Meeting-ah hian DLTF Member thahnem tak telin Lokcdown thawh thumna kalpui meka hmalak dan tur hrang hrangte pawh sawiho a ni bawk.

Comments

Chhiar Hlawhte