Chanchin thar thenkhat :

Speaker hovin sawihona nei

Mizoram Legislative Assembly-a Legislature Party hrang hrang aiawh MLA te chuan nimin khan Assembly Speaker, Lalrinliana Sailo hovin a Pisa-ah COVID-19 chungchangah Meeting an nei a. He hunah hian Speaker chuan Lok Sabha Speaker, Om Birla hovin State hrang hrangin Video Conference an neih chungchang a report a. State hrang hranga Legislator (MLA)-ten COVID-19 chungchang an inhrilhhriat zung zung theih nan leh hmalak dan tur inhriatpawh tlanna turin Parliament leh State Assembly hrang hrang ah Control Room siam nise an tih thu leh Mizoram Legislative Assembly pawhin he thu-tlukna hi zawmin COVID-19 pual hian Control Room siam ve nghal a nih thu a sawi bawk.

He hunah hian COVID-19 hri leng mek leh sawrkar hmalakna te thlirho niin a tul ang zela sawrkar hmalakna puibawm tur leh mipuite harsatna sukiang tura hmalak zel an inhuam thu an sawi a. Mipuite chu fimkhur tak si a, thla-muang taka awm turin an chah bawk.

Deptt. ah Ambulance hlan

Siaha District Bawrhsap, Bhupesh Chau-dhary IAS-in Oil and Natural Gas Corporation (ONGC) CSR atanga a dilchhuah Force Trax Ambulance, Diesel-BS-IV Rs.10,66,776/- man chu nimin khan Siaha-a Medical Department te hman turin Chief Medical Officer, Dr. C. Hniecho leh District Medical Superintendent, Dr. C. Lalrosanga te kutah a hlan a. Siaha District Bawrhsap hian nikum (2019) November thla khan BPCL te CSR atangin Mobile Medical Van cheng nuai 35 man dilchhuakin, Medical Department te hnenah a lo hlan leh tawh bawk a ni.

Enkawl dam pung ve zel

Nimin tlai thleng khan India ramah COVID-19 kai hmuhchhuah 42,836 awm tawhin mi 11,761 te chu enkawl dam an ni tawh a, he hri kai nunna chan mi 1389 awm tawh bawkin mi 29,685 enkawl mek an ni a, enkawl dam hi za zela 27.45 an tling tawh a ni.

Kaihhruaina tichhuak thar

Health Department chuan COVID-19 dona kawnga Local/Village Level Task Force leh Volunteers te inkaihhruaina tichhuakin COVID-19 vei nia rinhlelhte dap chhuah kawngah te, COVID-19 vei emaw rinhlelhte emaw biru leh inhriattir duhlo te zawnchhuah kawngah te, Sawrkar in Quarantine dan a siamte zawm duh lova tlanchhuak te zawnchhuah kawngah leh COVID-19 vanga boralte ruang sawngbawl leh fel fai taka phum danah sawrkar thuneitute/hotute an pui ang.

Committee din thar

Mizoram Sawrkar chuan COVID-19 hri-pui lengin Mizoram sum leh pai dinhmun a nghawng dan zirchiang turin leh hemi chungchanga a tul anga rawtna siam turin Finance Commissioner kaihhruaina hnuaiah Committee a din thar a. He Committee a Member atan hian Secretary, Planning & Programme Implementation Department, Addl. Secretary, Finance Department leh Addl. Secretary, DP & AR(GSW) te ruat an ni bawk.