Kumin a HSLC Exam result tihchhuah a ni

Serchhip District atangin Top 10-ah mi pakhat a lang

Mizoram Board of School Education (MBSE) chuan nimin khan High School Leaving Certificate (HSLC) Exam result a tichhuak a, kumin hian zirlai Exam zawng zawng atanga 68.33% pass in kum hmasa aiin Pass percentage hi a sang hret a. Serchhip District atangin Top-10 a lang zirlai pakhat a awm bawk.

Nikum (2019)-a MBSE in HSLC Result a tihchhuah ah khan zirlai 67.65% pass laiin, kumin 2020-ah chuan 68.33% in pass thung a, kumin hian Zirlai exam tura inziaklut zawng zawng 18,594 zingah 18,036 an exam a, mi 12,324 pass in, failed 5552 an awm. Exam tura inziak lutah mi 558 in exam an pe lo a, Compartmental Chance nei zirlai 160 an awm a ni. Kum dang ang bawkin kumin hian Exam bei tur inziaklut mipa aiin hmeichhia an tam zawk a, mipa 8738 leh hmeichhia 9856 te inziaklutin Exam laia hnawhchhuah leh Exam hmachhawn kim lo an awmlo thung a. Regular a exam beitu 17,712 leh Private-a Exam beitu mi 324 an awm bawk.

Kumin hian Distinction-ah mi 851 an pass a, First Division-ah mi 2863, Second Division-ah 4516, Third Division ah 4094 an awm bawk. Pass vek School 65 an awm laiin Failed vek School 16 an awm thung. Management wise in kumin hian sawrkar Schools atanga exam beitu 63.06% pass in, Deficit Schools 92.632%, Aided Schools 59.1%, Lumpsum School 67.70%, Private Schools 72.71% leh Private Candidate 32.41% in an pass a ni. Subject bat nei, Compartmental Chance nei te tana Exam neih leh hun tur hi MBSE chuan a hranpa a la tarchhuah turin ruahmanna a siam a, hetihlai hian subject hnih china Complaint duh tan May ni 28, 2020 thleng hun hawn a ni.

Kumin a HSLC Exam result chhuak ah hian Top 10-ah mi 19 an lang a. A pumpuiah Lalhlimpuii d/o C.Vanlalsiama, Simon Lalremsiama S/o Shangpliang Kyrshanbor Shangpliang, Singokhai Chozah d/o C Thahe, St. Paul's HSS, Aizawl te chu pakhatna niin mark 500 ah 476 an hmu a, kum hmasaa HSLC pakhatna chu kumin a pakhatna hian mark 10 in an phak lo, Top 10 mi 19-ah St. Paul's HSS zirlai 8 an lang bawk a ni.

Kumin a HSLC Exam Result chhuak ah hian Marian H/S Serchhip-a zirlai, Lalrem-puii d/o Lalrammawia, Serchhip Chanmari Veng chu Mizoram pumah 10-na niin Serchhip District atanga Top 10-a lang awmchhun a ni a, Subject zawng zawngah Letter Mark hmuin Mathematics-ah mark 99 hmu a hmu a, he Subject-a titha ber mi 5 zingah a tel bawk a ni.