Hrilen hnuah Mizoram bakah sawrkar laipui sum dinhmun a sawi chian theih loh - Chief Minister

COVID-19 dona kawnga Mizoram sum dinhmun sawi chiang tura nawrna nasa tak karah Finance changtu Chief Minister, Zoramthanga chuan COVID-19 hrileng vangin India ram sum dinhmun emaw, Mizoram sum dinhmun dik tak emaw tuman an sawi thei lo tih a sawi.

Nimin a mipuite hnena thuchah a sawiah Chief Minister, Zoramthanga chuan sum dinhmun chu hrilen tan hma chuan a sawi lawk theih a nih thu leh tunah erawh chuan sum lakluh tur zat a hriat theih loh avangin rinthu bak a sawi theih loh tih a sawi a, Mizoram sum hmuh thin zaa 90 zet chu Central atanga hmuh thin a ni tih sawiin, “India ramin harsatna lian a su dawn a, Mizoram pawhin harsana lian a nei dawn tih a hriat a, a chhe ber a lo thlen pawha harsatna tawk lutuk lo tura theihtawpa lo inbuatsaih lawk a ngai a ni,” a ti. Chief Minister hian 2020-21 Budget pass laiin COVID-19 a la leng lova, khatih hunlai khan pawisa pawh a harsa lo a, hri a len hnuah Chhiah lakna te a chawlh tak thup avangin sum hmuh tur a hriat lawk lova, fimkhur takin kan kal ta vek a ni, a ti a. NEC atanga cheng vbc 3 Mizoram sawrkarin a dawn, hman loha awm chu NEC-a Mizoram sawrkar chanpual sa, COVID-19 kaihhnawiha hman phalna pek a ni, a ti a, sanction a nih atanga thla khat chhungin hman theih ngaihna a awm lo tih a sawi bawk.
Chief Minister chuan COVID-19 dona tura Chief Minister's Relief Fund-a sum thawhtute leh a hman chhuah dan chu a duh apiang hnenah pekchhuah theih a ni tih pawh sawiin, tun thlengin Chief Minister's Relief Fund-ah hian pawl leh mimal 309 in cheng vbc 7.64 an chhunglut tawh tih a sawi a, cheng vbc. 5.54 vel hman chhuah a nih tawh thu leh hman bang cheng vbc. 2 chuang a la awm tih a sawi a. He sum hman dan tur ngaih-tuahtu Committee chu Chief Secretary kaihhruai a din a nih thu leh sum hman danah rinhlelh tur a awm loh thu a sawi a, a hman dan tarlanna chu MLA te pawh a copy pek vek an ni, a ti bawk.
Sawrkarin PPE a lei zinga tha tawk lo chungchang pawh sawiin CM chuan, inbuatsaih lawkna awm hman lo anih avangin India sawrkar pawhin ramdang ami a dap a, a lo thleng hlim State ten an in chuh a, boruak a fim deuh hnuah chuan fim zawka ngaihtuah theih a ni ta a. A tira mi kha indem nana hman loh a tha a ni, a ti bawk.

Comments

Chhiar Hlawhte