Latest News

Ramchhunga hruai haw tur 9790 zingah Serchhip District-a rawn haw tur 426 an awm

Mizoram sawrkar chuan India ram hmun hrang hranga Mizo awm te hruai haw hna chu thawk mekin tuna la hruai haw tura ruahman mi 9790 zingah Serchhip District-a hruai haw tur mi 426 an awm nia chhinchhiah a ni.
Rampum-a inkharkhip kalpui mek a nih avanga Mizoram mi hruai haw hna thawh turah hian Mizoram District hrang hrang zingah Aizawl District-a hruai haw tur tam berin mi 4581 hruai haw an ni dawn a, Siaha District-ah mi 928 hruai haw tur niin Champhai District-ah mi 741, Lawngtlai District-ah mi 713, Lunglei District-ah 730, Kolasib District-ah mi 578, Mamit District-ah mi 549, Serchhip District-ah mi 426, Saitual District-ah 224, Khawzawl District-ah 188 leh Hnahthial District-ah mi 132 hruaihaw tura ruahman an ni.
He hruai haw hna thawh turah hian India ram chu Zone 5-ah then niin Western Zone- Maharastra, Gujarat, Rajasthan leh Goa atangin mi 183 hruai haw tur an awm a. North East Zone- India hmarchhak State hrang hrang atanga hruai haw tur mi 8 awmin heng te hi nagaland, Manipur leh Tripura atanga hruai haw tur an ni a. South Zine atanga hruai haw tur mi 126 awmin heng te hi Tamil Nadu, Telangana, Puducherry, Karnataka, Kerala leh Andra Pradesh mi niin an zinga thenkhat hi chuan Mizoram an rawn pan mek a ni. Heng bakah hian Central & East Zone atanga rawn haw tur mi 43 awmin heng te hi Chhattisgarh, Madhya Pradesh, Uttar Pradesh, West Bengal leh Jharkhand atanga rawn haw tur an ni a, North Zone atanga rawn haw tur mi 66 awmin heng te hi Delhi, Punjad leh Uttarakhand atanga rawn haw tur an ni bawk.
Tunhnaia Chief Secretary in Mizoram-a rawn haw turte sawrkarin Quarantine Facilities a neih zawng zawngah an lêng vek dawn loh bakah hmun khata mi khunghran chu a risk a sân avangin mahni In lama inkhunghranna neite chu Village/Local Level Task Forcete hriatpuina in Home Quarantine phalsak an nih tur thu a sawi chungchangah Serchhip District Bawrhsap chuan Home Quarantine phal theih dan an la dawn loh thu a sawi a, Disaster Management & Rehabilitation Department-a Serchhip District Organiser, Vanlalduhi Ralte pawhin tun dinhmunah chuan State pawn atanga Serchhip District-a rawn haw turte chu Home Quarantine-a dah tumna an la neih loh thu sawiin, tun dinhmunah sawrkarin inkhung hranna (Quarantine Centre) a siamah mi 274 an awm theih thu leh mi 38 an awm mek thu a sawi a, a tul dan angin Quarantine Centre hi siam belh zel tumin ruahmanna an siam tawh tih a sawi a, state pawn atanga lo haw te hi an pelhe lohna turin hmalak an tum tih a sawi a. Tunah hian Serchhip District-ah Quarantine Centre hi 22 awm mekin heng bak siambelh tur pawh hi ruahman lawk a awm nual bawk a ni.

Comments

Popular News (Last 30 Days)