Chanchin thar thenkhat :

Hmalak dan tur sawiho

Nimin khan Hnahthial DC Conference Hall ah Hnahthial District Bawrhsap, Vanlalmawia leh Mizoram sawrkar hnuaia Agriculture Development Board member-te chuan inkawmna neiin buh leh thlai tharchhuah kawnga hmalak dan tur an sawiho a. He hunah hian Agriculture Development Board Member, Lalropuia Pachuau chuan kum 2018 - 2019 khan Mizoram in Buh kan mamawh hmun thum a thena hmun khat vel kan thar tih sawiin, kumin hian kum danga kan siam ngai loh, harsa lutuk lova Buh leh thlai kan thar theihna tur hmun te siam tura sawmin, chumi atan chuan sawrkar pawh a inhawng em em tih a sawi bawk. He huna tarlan danin kumin 2020 hian Hnahthial Sub-Division huamchhungah COVID-19 hrilen hmaa Thingtlang Lovah 1106 Hectare a nih thu leh Covid 19 hrilen hnuah Hectare 19 Chul rih a ni bawk.

Hmeichhe Seat tur pawt

Aizawl Municipal Corporation (AMC) ding-lai term chu kumin ah a tawp dawn tak avang leh kumin kumtawp lamah inthlanna neih a nih dawn avangin he inthlanna neih tura Ram Danpui in hmeichhia te tana ram leh tualchhung inrelbawlna ah seat awm atanga za zel a 33 a hauhsak (reserved) thlanna chu nimin khan Aizawl-a Central YMA Hall-ah neih a ni a. AMC-ah hian Ward 19 awmin Ward 6 te chu hmeichhia te tan hauh sak a ni a. Kum 2010 leh 2015-ah te Ward 6 ve ve pawh-chhuah ni tawhin a bak Ward 7 la awm atangin kumin a Hmeichhia te tana hauh tur Ward 6 chu pawh niin Ward III, VII, X, XIV, XVI leh XIX te chu pawhchhuah a ni a, inthlanpui tum 3 a pawhchhuah loh, Ward-V chu inthlanpui lehpek-ah hmeichhia te tan hauh nghal a ni ang.

Dan bawhchhia man tam

Mizoram (Containment and Prevention of COVID-19) Ordinance, 2020 hman a nih hnuah nimin thleng khan Mizoram-ah Dan bawhchhia mi 2641 man ni tawhin heng mite pawisa chawi pawh Rs. 6,03,400/- a tling tawh bawk.

HSLC result chhuak dawn

Mizoram Board of School Education (MBSE) chuan Vawiin, May 13, 2020 (Nilaini) chawhnu dar 1:00 hian HSLC Examination 2020 Result a tichhuak dawn a, www.mbse.edu.in-ah en theih a ni anga, MBSE Office-ah chuan tarchhuah a ni lovang. Result hi ngaihven duh tan Whatsapp-ah Ph. No. 7005678588/9774740110/98626-10947 leh 8974738793-ah zawh theih a nih dawn bakah Phone Call-a zawt duh tan 9366552428/7005121359/9612183177/9612568390/2390993/2390992/2390995 leh 2347841-ah te zawh theih a ni bawk ang.

Hlawh cut tih chi-ah ngailo

BJP Mizoram Thalaite chuan Central sawrkar in COVID-19 hri dona kawngah Mizo-ram State chu tanpuina a pe tha hle tih sawiin, heti chunga Mizoram state sawrkar hnathawk te hlawh May –December, 2020 thleng, thla 8 chhung lai mai Cut sak tum chu thil tih chi ah an ngailo tih an sawi a. Mizoram Sawrkar hian sum a dawn tawh zawng zawng leh a hman tawhna te, a sum mamawhna te, a hman leh zel tulna te dilna fel tak siamin central sawrkarah thlen se, central sawrkar chu Mizoram State pui tur hian a inpeih reng tih an thuchhuah ah chuan an tarlang bawk.

Sawrkar mualphona niin sawi

MPC Treasurer, V. Lalthazuala chuan tunhnaia Speaker hova MLA rual thukhawm chuan sawrkar an phawrh mualpho hle nia sawiin, he Meeting hian COVID-19 dona atan leh chhawmdawlna atana CM Relief Fund bakah State sawrkar sum tam zawk hman nise, budget a sum ruahman sa pawh a tul anga siamrem ni thei se an ti tih a sawi a. “Speaker hova meeting hian Chief Minister, Finance Minister ni bawk an rintawk loh zia a tarlang chiang hle a ni. Speaker ho meuh a rorelte hi Mizoram sawrkar hian ngaipawimawh se, state budget pawh COVID-19 do nan hmang ve ngam se kan duh hle a ni,” a ti bawk.