District Bawrhsap in khawchhunga VLTF Duty a tlawh

Serchhip District Bawrhsap leh District Level Task Force on COVID-19 Chairman, Dr. Lalzirmawia Chhangte chuan nimin khan Serchhip khaw chhunga Village Level Task Force duty te a tlawhkual.

VLTF Duty-na a tlawhna ah hian Dr. Lalzirmawia Chhangte chuan COVID-19 laka mipuite himna tura theihtawp chhuaha duty thin VLTF te chu lawmthu hrilhin, engchen nge hetianga kan awm a tul dawn hriat a nih loh avangin hmabak lo la awm zel thei ah pawh Village Level Task Force te chu inbuatsaih sauh sauh turin a ngen a. VLTF duty te hian harsatna an neih leh rawtna an neihte chu Bawrhsap hnenah hian lo thlenin, a theih chin chinah heng an harsatna te hi ngaihtuahpui a tum thu Bawrhsap hian a hrilh bawk a ni.

District Bawrhsap hian niminpiah khan Serchhip chhim lam kawtchhuah-a VLTF te duty na, Sailiamkawn chu a lo tlawh tawh a, nimin-a VLTF Duty-na a tlawhna ah hian Veng-chung atanga tanin hmar lam kawtchhuah Chhiahtlang thlengin a tlawh a, Serchhip DC Office atangin Samuel Zodinsanga MCS, SDC chuan a tawiawm a ni.