COVID-19 avanga enkawl chhuah tir theih beisei

Health Minister in mipuite fimkhur turin a chah

Health Minister Dr. R. Lalthangliana chuan Zoram Medical College (ZMC)-a COVID-19 natna avanga damlo enkawl chu Vawiin hian damdawi In atanga chhuah tir a ni tawh dawn tih sawiin, mipuite chu sawrkar thupek zawma fimkhur turin a chah bawk.

Nimin a mipuite hnena thuchah a tihchhuah ah Health Minister, Dr. R. Lalthangliana chuan Zoram Medical College-a COVID-19 natna avanga enkawl mek mi pakhat chu a Sample Test a negative vek tawh hnuah amah pawh a taksa in hma a sawn zel tih sawiin, harsatna engmah a neih tawh loh avangin a dam fel tawh a ngaih a ni, a ti a. Vawiin May 9, 2020 hian ZMC damdawi In atangin chhuah tir a ni tawh dawn tih a sawi a, Mizoram chhung leh pawna mi tam takin an tawngtai sakna avang leh ZMC-a amah enkawltu Doctor, nurse leh damdawi In Staff zawng zawngte thawhrim rah a ni, a ti a. Hetih rual hian mipuite chu sawrkar thupek zawma fimkhur tura chahin, Social Distancing zawm tha tur leh kut silfai ngun te bakah sawrkar-in dan zawm tur a chhuahte zawm tha hram hram turin a chah bawk.

Health Minister, Dr. R. Lalthangliana chuan Kolkata Mizoram House-a awm COVID-19 vei hlauhthawn thila Quarantine Facilities a dah mi 17 te Sample Test result pawh nimin khan chhuakin an vai hian a negative vek tih sawiin, A hma a Sample Test result pahnih negative nen an vaiin mi 19 test result a negative tak thu a sawi a. Mumbai Mizoram House dinhmun pawh tarlangin, Cancer vei damlo pakhat leh House thawk hnamdang mi pakhat positive case neih mek te bak midang zawng chu an negative vek tawh tih a sawi bawk.

Hetihlai hian Falkawn COVID-19 Testing Laboratory-ah nimin khan Sample thar pahnih test leh niin a negative ve ve bakah niminpiah a Sample Test pahnih te pawh a negative vek a. Nimin a Sample Test pakhat zawk hi Kolasib atanga Rapid Antibody Test-a positive niin amah hi nausen a ni a, hetianga Rapid Antibody Test-a a positive avang hian an chhungkua in ZMC-ah hian admit an ni a, amaherawh chu Sample Test neih a nih hnuah COVID-19 chu a negative ta a ni. Heti hian  Falkawn-a COVID-19 Laboratory ah hian nimin thleng khan Sample 141 test a ni tawh a ni.