COVID-19 do nan MLA ten an hlawh zaa 30 an pe dawn

Nimin-a Mizoram Assembly Speaker hova Assembly Legislature Party hrang hrang aiawhte thukhawm chuan kumin December thla thlengin an hlawh zaa 30 chu COVID-19 dona atan pek nise an ti.
Mizoram Legislative Assembly-a Legislature Party hrang hrang aiawhte hi nimin khan Assembly Speaker, Lalrinliana Sailo hovin a pisa-ah thukhawmin COVID-19 hripui leng do nana an hlawh pek then dan tur an ngaihtuah a, he hunah hian MNF, ZPM leh BJP MLA te telin MLA ten an basic pay atanga zaa 30% chu May thla atanga kumin December thlengin COVID-19 hrileng dona atan CM Relief Fund ah pek nise tiin an rel a. Hei bakah hian Chief Minister-in thlatin Rs. 20,000 leh Council of Ministers, Speaker leh Deputy Speaker leh Govt. Deputy Chief Whip ten thlatin Rs. 15,000 theuh thawh belh zel nise an ti a ni. He huna Legislature Party aiawh kalkhawmte chuan MLA-LADS Fund 2020-2021 atangin COVID-19 Fund atan CM Relief Fund-ah cheng nuai 50 theuh thawh nise an ti bawk. COVID-19 do nan hian Minister te chuan an thla chanve hlawh leh MLA tin ten an karkhat hlawh theuh chu March thla hlawh atangin Chief Minister's Relief Fund-ah an lo thawh tawh a ni.
Nimin-a Legislature Party aiawh kalkhawmnaah hian Congress Legislature Party aiawhte an kal loh avangin COVID-19 Fund atana hlawh cut chungchang leh MLALADS Fund thawh chungchanga thutlukna chu an zalennaah dah a ni thung.

Comments

Chhiar Hlawhte