MLA pui te leh mipui zah lovah CLP Leader an puh

MNF Party chuan Congress Legislature Party Leader, Zodintluanga chu a MLA pui te leh mipuite zah lovah an puh.
Nimin a thuchhuah an siamah MNF Party chuan CLP Leader, Zodintluanga hian sawrkar hnathawkten an hlawh (basic pay) atanga 10% leh 5% -te pe tura an in-volunteer chu a lawmthu a sawi rualin, Minister leh MLA-ten hma an hruai lo tiin na takin a dem tel bawk tih an sawi a. MLA-te hian an chawlhkar khat hlawh (25%) leh Minister-ten an chawlhkar hnih hlawh (50%) chu COVID Fund (CM's Relief Fund) atan an lo pe hmasa daih tawh tih an tarlang.
MNF thuchhuah chuan hetianga MLA leh Minister ten an hlawh an pek hnu May 4, 2020 khan an pek chhunzawm zel dan tur ngaihtuah in Speaker, Lalrinliana Sailo hovin an thukhawm tih pawh tarlangin, Party tin Legislature Member ten sawikhawmin, 'Kan ngaihdan leh duhdante sawihoa thutlukna te siam turin i thukhawm leh thuai ang u,' tiin ngaihtuah dan an thiam theih nan State hrang hranga MLA-te thawh dan lists pawh an inpek vek thu leh a hma thei ang bera thawhkhawma thutlukna siam turin an rel lai mek a ni tih an tarlang a.
He thu relnaah hian CLP Leader, Zo-dintluanga pawh hi a tel thu leh thutlukna siam thuai tura ngaihtuah mektu zing ami a nih laia hetiang thu a sawi ta mai hi a puitlin loh thlak hle-a an hriat thu leh a MLA puite leh mipuite a zah lo hle ah an ngaih thu an sawi a. “Party Legislature Leader dangte chuan sawi tul lovah an ngai a ni ngei ang - Puitling takin an thutlukna siamna tur chu an relkhawm hun atan an dah thap a ni. Thutlukna siam tura an relkhawm hunah Pu Zodintluanga hian tel veleh tho a la tum em tih chu kan hre lova, kum tam tak ruling party lo ni tawh Legislature Party Leader meuh tan chuan thu sawiawm a ni lo takzet a ni,” an ti bawk.

Comments

Chhiar Hlawhte