Chanchin thar thenkhat :

Kolasib-ah thukhawm

Nimin khan Kolasib-ah District Bawrhsap, Dr. H. Lalthlangliana hovin District Level Task Force on COVID-19 thukhawmin Lockdown chhunzawm leh chhunga khawtlang a inkaihhruai dan tur hrang hrang an sawiho a. He huna tarlan a nih danin Sawrkar ruahmanna anga rampawn atanga lo haw, Vairengte Screening point paltlang chu tun thla ni 4 thleng khan mi 926 an tling tawh a, ramri-a kalkhan hmun 61-ah duty-na siam a nih bakah, Duty inchhawk a ngaih pawha inchhawk thei turin thalai 456 inziaklut an awm thu te a sawi a. Kolasib District paltlang a rampawn atanga mihring lo lut te chu Doctor leh Screening point a duty ten uluk tak a an endik vek thin thu a sawi bawk. Hei bakah hian ramri venhim uluk zawk kalpui a nih theih nan Border Safety Monitoring Team din a nih thu leh he Team hian ramri a duty-na hmun zawng zawng tlawhchhuakin an mamawh leh harsatna te a ngaihtuah sak dawn a ni.

Ramri vengtu chungah lawm
Nimin khan Chief Secretary, Lalnunmawia Chuaungo, Addl. Chief Secretary JC. Ram-thanga, Mizoram DGP SBK. Singh, Home Secretary, IGP te, Aizawl DC leh Central YMA hruaitute chu Chief Secretary’s Conference Hall, Aizawl-ah thukhawmin COVlD-19 hripui leng mek avanga Mizoram hmun hrang hranga ven-himna hna thawktu zawng zawngte chungah lawmthu an sawi a. Tlawmngaia venhim hna thawktute avangin he hripui lakah hian kan ram pawh a la him rih nia a lan thu leh hetih mek lai hian kan hmalam hun tur hi hriat a nih loh avangin ramri a venhim hna fei leh tlo taka nitin eibar zawnna khaihlak si lova a remchan dan anga ruahmanna siam theuh turin an ngen bawk.

MNF in nuai 20 chhunglut
MNF Party chuan nimin khan COVID-19 hripui leng dona atan a tul anga hman turin Chief Minister's Relief Fund-ah cheng nuai 20 an chhung-lut a, heti hian CM Relief Fund-ah hian cheng vbc. 7.56 zet a lut tawh a ni.

Mizo ruang rawn thlenpui
Kar kalta Zirtawpni-a Hyderabad-a boral, Zonunsiama (19) S/o Lalramchhunga, Bethlehem veng Aizawl ruang chu nimin khan Aizawl rawn thlenpui niin nimin vek khan vuiliam a ni. Zonun-siama hi Hyderabad-a Green Park Hotel-a thawk niin Zirtawpni khan Chuap TB avangin Govt. Chest Hospital, Hyderabad-ah a boral a, a ruang hi Inrinni khan Ambulance hmanga Mizoram-ah rawn phurh niin a ruang hi a thiante 3 in an rawn zui a, nimin a Aizawl rawn thlenpui a nih hnuah vuiliam nghal a ni.

Mizoram dinhmun thar ber
Nimin tlai dar 5:00 thleng khan Mizoram ah COVID-19 kaihhhnawih ah mi 77,054 endik ni tawhin mahni In lama khunghran mi 7166 leh sawrkar hmun siama khunghran 2045 an awm tawh a. Rapid Anti Body Test of India (RATI)  neih mi 1252 awm tawhin mi 188 te Sample lak a ni tawh bawk a, heng atang hian COVID-19 kai hmuhchhuah mi pakhat awmin enkawl dam a ni tawh a, COVID-19 kai rinhlelh mi 34 te chu damdawi In-ah dahluh ni tawhin mi 32 te chu chhuahtir an ni tawh bawk.

Sawrkar-ah ngenna thlen
Taitesena Group YMA chuan Kanhmun-ah COVID-19 hri vei dahhranna hmun leh lirthei lo lutte damdawi hmanga kah thianghlimna dah a nih hma chuan Kanhmun paltlanga State dang nena inkalpawhna chu hawn rihloh tha an tih thu sawrkar hnenah an thlen a, a rang thei ang bera hma la turin Chief Secretary chu an ngen bawk. Taitesena Group YMA hian Mizoram mipuite hrileng laka an him theihna a nih beiseiin sawrkar in inkharkhip hi a thlahdul a nih pawhin a theih chin chinah State thenawm leh Bangladesh ramri hrulah chumlo chat lova ramri veng indah reng tumin a inbuatsaih mek bawk a ni.

Delhi-a Mizote puihna hlan
National Thermal Power Corporation Limited (NTPCL), Govt. of India Enterprise chuan nimin chawhnu khan New Delhi Mizoram House-a Addl. RC leh staff te hnenah Delhi-a cheng Mizo zinga COVID-19 Lockdown avanga khaw-sak harsa zualte tan ei tur a thlawnin an sem a. He an hmalakna hi Mizoram Chief Secretary, Lalnunmawia Chuaungo in a ruahman sak niin he hunah hian buhfai bakah chawhmeh leh a bawlhlo chi hrang hrang sem a ni.

Sample Test negative
Kolkata Mizoram House-a Cancer vei en-kawllai COVID-19 kai leh a hnua boralta, Vai-rengte ami awmpuitu a fate pahnih chu an sample test neih a nih hnuah an negative ve ve nia thudawn a ni a. Tunhnaia Mizoram-a rawn haw, Lawng-tlai-a Quarantine Centre-a dah mek mi 3 te pawh rinhlelhna a awm avanga sample test neih a nih hnuah an negative nia thudawn a ni bawk.

A thlawna Buhfai semna man rulhlet a ni
COVID-19 hripui leng avanga Mizoram Sawrkar in miharsa, inhlawh chawpte tanpui nan Retailer-te kaltlanga a thlawna buhfai a sem chhuahna senso zawng zawng chu rulhlet a ni a. Hemi atana Labour Employment Skill Development & Entrepreneurship Department hnuaia Mizoram Building & Other Construction Workers Welfare Board atanga Food, Civil Supplies & Consumer Affairs Department in sum a hmuh chu DCSO zawng zawng hnenah nimin khan pekchhuah a ni a. Civil Supplies & Consumer Affairs Department chuan Retailer zawng zawng te chu anmahni bialtu DCSO theuhah an bill lak tur lo ngaihven turin an hriattir a ni.

India dinhmun thar ber
India ramah COVID-19 kaihhnawih ah mi 11,91,946 te Sample enfiah ni tawhin COVID-19 kai hmuhchhuah 46,711 an awm tawh a, mi 13,160 te chu enkawl dam an ni tawh. Indian Council of Medical Research (ICMR) chuan India ramah tunlai-a hri leng, COVID-19 kai rinhlelh sample 11,91,946 endik a nih tawh thu sawiin, hengte hi sawrkar Laboratory leh mimal Laboratory-a endik an nih thu a sawi. ICMR chuan sawrkar leh mimal Laboratory-te chu COVID-19 Sample endik phalna a pek belh zel a. Tunah hian sawrkar Laboratory 320 leh mimal Laboratory 114-te chu COVID-19 sample endik tur hian phalna pek an ni tawh a ni.
Hetihlai hian India ramah COVID-19 kai hmuhchhuah pawh an awm belh mek zel a, he thu buatsaih lai thleng hian India ramah he hri kai hmuhchhuah hi 46,711 awm tawhin mi 13,160 te chu enkawl dam an ni tawh a, he natna thihpui mi 1583 an awm tawh bawk. India rama he hri kai hmuhchhuah an pun zel rual hian enkawl dam pawh pung ve zelin tun dinhmunah he hri kai atanga enkawl dam hi za zela 28.17 an tling a ni.

Comments

Chhiar Hlawhte