Education Minister hovin School Fee sawiho a ni

Nimin khan School Education Minister, Lalchhandama Ralte kaihhruaina in a Pisa-ah zirna kaihhnawih pawl hrang hrangte chu zirlaite hnena School Fee lakdan chungchang ngaihtuahin an thukhawm.

He hunah hian School Education Minister, Lalchhandama Ralte chuan Mizoram mai nilo khawvel in ala hmelhriat ngailoh COVID-19 hripui leng avangin kan ram zirna pawhin harsatna lian tak a tawk chho a, kumdanga School tan hun pangngaiah zirna In pawh hawng theilo in kan awm ta hial a ni, a ti a. He hripui leng hian kan ram leh chhungkaw tin economy a khawih avangin kumdang-a kan kaldan pangngai a kal remchan lohna tam tak a awm ta a. He kan harsatna tawh avang hian Mizoram chhunga zirna In zawng zawngte pawh inhriatthiamna thui tak nei a kal turin a ngen a. COVID-19 vanga harsatna tawh chhungin School hrang hrangte pawh fee sang zawk la lo tur leh zirna In a fee chi hrang hrang lak thinte pawh ti tlem turin a ngen bawk.

He Meeting hian Kohhran leh Private School zirna In hrang hrangte hnenah ngenna siamin Mizoram-ah COVID-19 avanga Lockdown neih chhunga zirna In te hawn a theihloh chhung hi chuan zirlaite hnen atangin Monthly Fee 50% aia sang lakloh tur a ni a. Hun harsa kan tawnlai a nih avangin mi harsa School Fee pe theilo te chu ngaihnatthiamna pe tur leh a tul chuan Fee awl thlenga an harsatna sutkian pui tura ngenin, kum 2020 April thla chhung atana School Fee a full a lo la tawhte pawhin May 2020 atan siamrem turin an ti a ni.