Chanchin thar thenkhat :

Cement tam zawk lakluh rel

COVID-19 dona atana din, Task Group on Commodities & Transport chu nimin khan an Chairman, HL. Rochungnunga, Commissioner & Secretary, Food Civil Supply & Consumer Affairs Department kaihhruaiin Aizawl-ah an thu-khawm a, COVID-19 hripui lenlaia Mizoram chhunga Cement a tam thei ang ber lakluh a nih theih nan sawrkar thuneitute hnenah thlen ni se an ti a. Mizoram chhunga Cement phurhluh reng reng Vairengte Check Gate-ah report nise an tih bakah Cement lakluh chhun te pawh rualkhai tak leh man pangngai aia to a hralh lo turin a zuartute an ngen a. Cement bakah buhfai a man to-a hralh an awm chuan thuneitute hnena hriattir turin an ngen nghal bawk.

Kenbo Bikes lakluh khap
Kolasib District Bawrhsap chuan tunhnai ah Myanmar rama Kenbo Bikes (Myanmar-a awm te'n One-two-fai an tih mai) neituten Mizo-ram Temporary Registration Number lem hmangin Mizoram chhunga dan lova sumdawnna an kalpui thin tih hriat a nih thu sawiin, heng Kenbo Bike hi sawrkar laipuiin ramchhunga lakluh a phal loh anih thu a sawi a. Hei vang hian an District chhungah Kenbo Bikes lakluh leh registration tih phal a ni lo tih sawiin, heng bike lo lalut emaw, register tum an awm chuan dan angin an chungah action lak a ni ang tih a sawi bawk.

Task Force hmalakna sawipui
Kolasib bialtu MLA leh Supply Minister, K. Lalrinliana chuan nimin khan Kolasib District Bawrhsap, Dr. H. Lalthlangliana chu  COVID-19 hri leng avanga lock down kalpui mek chungchangah District Level Task Force te hmalak mekna te a sawipui a. Kolasib DC chuan Lockdown zawh hnuah COVID-19 Screening Point tam zawk siam nise tiin, Task Force duty point te enkawl a vil turin Duty thei tur Volunteer Team 29 siam anih thu leh duty tur volunteer mi 196 ruahman fel anih tawh thu a sawi bawk. Bialtu MLA hian Task Force hmalakna chhunzawm nan Rs. 50,000/- a hlan nghal bawk.

MLA 2 ten ramri an tlawh
ZPM Legislature Party-a Deputy Chairman, Vanlalhlana leh Aizawl West-III bialtu MLA, VL. Zaithanzama te chuan nimin khan Vairengte a Check Gate tlawhin Assam atanga motor lo lut tur an kap thianghlim lai a hmunah an en a, heng Motor te hi uluk zawka kah a nih loh chuan a him tawklo ang tih an hlauhthawn thu a hmuna mawh-phurtute hnenah an thlen nghal bawk. Heng MLA pahnih te hian Kolasib District Bawrhsap Dr. H. Lalthlangliana pawh kawmin, ramri venhim hna thawh dana rawtna an neihte an sawipui a, Buhchang-phai leh Phaisen-a Duty te pawh an tlawh bawk.

Mi 73,829 enfiah tawh
Nimin tlai dar 5:00 thleng khan Mizoram ah COVID-19 avangin mi 73,829 te enfiah ni tawhin mahni In lama inkhunghrang tura tih mi 6909 leh sawrkar hmun ruat bika inkhunghrang mi 794 an awm tawh a. Rapid Anti Body Test of India (RATI) hmanga enfiah mi 90 awm tawh bawkin COVID-19 test tura sample lak mi 180 an awm tawh bawk a. Heng Sample lak te atang hian COVID-19 kai hmuhchhuah mi 1 a awm tawh. He natna kai nia rinhlelh Dam-dawi In-a dah mi 30 awm tawhin an zinga mi 29 chu chhuah tir an ni leh tawh bawk.

COVID-19 kai enkawl dam an pung ve zel
Nimin tlai thleng khan India ramah COVID-19 kai mi 35,365 hmuhchhuah ni tawhin enkawl lai mi 25148 an awm a, mi 9064 te chu enkawl dam ni tawhin he natna avanga nunna chan mi 1152 an awm tawh bakah rampawn-a thawnchhuah mi 1 a awm bawk a ni. He natna kai atanga enkawl dam hi 25.62% an tling a ni.

Comments

Chhiar Hlawhte