Agriculture Development Board thukhawm

Mizoram sawrkar hnuaia Agriculture Development Board chuan nimin khan Agriculture Minister, C. Lalrinsanga hovin COVID-19 Lockdown thawh thumnaa loneitute tana ruahmanna leh Mizoram buh leh bal thar kawnga hmalakna ah te inrawnkhawmna an nei.

He inrawnkhawmna ah hian Agriculture Minister leh Agriculture Development Board Chairman, C. Lalrinsanga chuan Mizoram-ah Lockdown avangin mahni eitur tharchhuah kawngah mitin an thangharh tih sawiin, a thei theiin chuktuah huan bakah mahni inbul hnaiah leh a theihna hmun tinrengah thlai thar neih tumin hma an la tih a sawi a. Ramin a mamawh em em damdawi tel lo leh ram leilung ti chhe lo a loneih dan ‘organic farming’ pawh sawrkar chuan uar zelin hma a lak belh zel bawk a ni, a ti a. COVID-19 dona kalzel piah lamah hri a lo kian deuh hnu thleng pawhin buh leh bal thar kawnga sawrkar ruahmanna awm tawhsa te chu a pawimawh zual sauh dawn tih a sawi bawk.

Agriculture Development Board chuan COVID-19 avanga loneituten harsatna an tawhloh nana Agriculture Department hmalak tawhna hrang hrang – Agriculture Minister hova DC leh DAO te nena Video Conference meeting a an rel angin, loneituten an hna tluang taka an thawh chhunzawm zel theihna tura Lo-a feh turte tan harsatna siam lo turin DC te a sawipui tawh thu te, puih an ngaihna huna lo tanpui thin tura DAO te hriattir an nih thu te, ni 04.04.2020 atanga Farmers’ Helpline kaltlanga loneitute mamawh leh harsatna mithiam ten an dawngsawng thu te, thlai chi thlak chungchanga Aizawl Bawrhsap hnena Agriculture Minister in ruahmanna a siam sak tawh chungchangte sawilan a ni a.

Heng bakah hian Focus District pali- Champhai, Serchhip, Kolasib leh Mamit hnuaia khaw hrang hrang tan Value Chain Crops- Sawhthing, Aieng leh Mizo Hmarcha chi te sem a nih thu te, Sub-Mission on Agriculture Mechanization (SWAM) hnuaiah Custom Hiring Center 50, Power Tiller 75, Mini Power Tiller 75 leh Paddy Transplanter te subsidy-a pek tura ruahman a ni thu leh Power Tiller hi semchhuah tan a ni thu te bakah PM-KISAN hnuaia loneitu 80,888 te account-ah April ni 22, 2020 thleng khan Rs. 16,17,76,000/- thun luh sak an ni tawh thu te, loneitute sum lakluh a lo pun theihna turin tuna Vaimim an chin hi seng zawh a nih hnuah Vaimim bawk emaw, lei that nana nitrogen fixation ti thei tur Bekang emaw Chana emaw ching tura hma lakpui a nih thu te leh SEDP hnuaiah Be (pulse)- Arhar, Rajma, Field Pea te 1,400 acre a zauvah chintir tum a nih thu te sawi a ni a. Agriculture Minister-in ruahmanna a siam angin Board member te chu Team 3-ah in thenin khaw hrang hranga loneitute tlawh turin ruahmanna siam a ni.