ZPM in COVID-19 dona hi langtlang taka kalpui a duh

Zoram Peoples Movement (ZPM) General Hqrs. chuan COVID-19 dona chu langtlang taka kalpui an duh thu sawiin, Health Minister hmalakna avanga COVID-19 Testing Laboratory kan nei thei ta chu lawmawm an tih thu an sawi bawk.

Nimin a thuchhuah an siamah ZPM General Hqrs. chuan Coronavirus (SARS-CoV-2) darh mek chu Zoram hmun hrang hrangah Local Level Task Force leh Village Level Task Force te'n chak taka an hmalakna avang leh mipuiin thu kan awihna avangin nasa takin kan inveng thei nia an hriat thu leh lawmawm an tih thu sawiin, Health Minister chak tak hmalakna avanga COVID-19 Testing Laboratory kan nei thei ta chu a lawmawmin ram tana thil chhinchhiahtlak tak leh mel lung pawimawh tak a ni tih an sawi a. Hetihlai hian Coronavirus dona kawng tam taka sawrkar thiltih dan chu a beitham mah mah nia a lan thu sawiin, “Chief Minister leh Home Minister hmalakna hriat tur a awm lova, Health Minister leh Chief Secretary te kutah engkim a awm vek a ni ber mai. Ram hruaitu lu ber a nih anga engkima hma hruai turin Chief Minister hi ZPM chuan a phut a ni,” an ti.

ZPM chuan Air India Cargo service hmanga Personal Protective Equipments (PPE) rawn phurhluh chu a phurhna ah ringawt pawh cheng nuai 16 chuang sen a nih thu leh heng PPE te hi mithiam lei ni lovin a quality a thalo hle niin an sawi a. ZMC in an hman duh loh avangin hmundanga hman turin sem darh mek nia an hriat thu sawiin, “Sawrkarin heng PPE suit, (mask, gloves etc) a leina man, eng company siam nge a nih a, tunge Supply tu tih leh COVID-19 Medical Operational Team duh dan anga lei a ni em tih hi mipui hriatah puangzar turin ZPM Party chuan a phut a ni,” an ti.

Hei bakah hian heng PPE te hi chah thlen pawh duh aia a tlai tawh laiin damdawi In leh COVID-19 dona a thawktute hnenah rang taka pechhuak mai tura ngaih a nih laiin, Minister leh Ruling Party MLA ten an bial-a Block kaltlanga an sem chuan mipui mak tih a hlawh hle niin an sawi a. “Opposition MLA bial-ah hian Sawrkar Hospital leh PHC engemawzat a awm a, hengte pek an ni ve dawn em tih hi ZPM Party chuan a zawt bawk,” tiin Coronavirus chuan Party a thliar loh avangin COVID-19 dona kawngah Party inthliarna paih ngam an duh thu an sawi.

ZPM chuan Central Sawrkar-in COVID-19 do nana State Disaster Risk Management Fund (SDRMF) atan cheng vbc. 23 min pek mek pawh hi a nihna tur ang taka hman a ni em tih hi ngun takin an enpui dawn tih sawiin, kan Police te thuamchak an la ni lo chu pawi an tih thu pawh an sawi a. Armed Police Battalion pasarih (7) che chhuak mai thei kan neih laiin ramri-ah Police duty an la tlem lutuk niin an sawi bawk.