Mizoram Assembly Speaker hlui Hiphei boralin tukin hian Siaha-ah vuiliam a ni ang

Mizoram Legislative Assembly-a Speaker hlui, Hiphei chu nimin zing dar 7:45 khan Civil Hospital, Aizawl-ah a boral a, a ruang hi Siaha-a an chenna In ah lak niin tukin hian vuiliam a ni ang.
Kum 82-a upa, Hiphei hi kum 2019 kumtawp lam khan Stroke vangin Civil Hospital Aizawl (CHA)-ah dahluh a ni a, hun rei tak enkawl a nih hnuah Guwahati Neurological Research Centre (GNRC)-ah kalpui a ni a. Hemi hnu hian Aizawl-ah a rawn kir lehin Damdawi In lamah te enkawl zui leh a ni a, a natna hi zual thutin nimin zing dar 7:45 khan a boral zui a. A ruang hi Aizawl Zotlang-a Mara House-ah lak a nih hnuah an chenna, Siaha-ah a ruang hi lak leh a ni a, nizan khan Siaha thlenpui niin tukin dar 7:30 hian vuiliam a ni ang.
Mizoram Legislative Assembly Speaker hlui, Hiphei hi August 13, 1937-ah Siaha District-a Chapui-ah a lo piang a, a pa hi Zate (L) niin thiamna lamah I.A a ni a. Politics-ah a lut hma hle a. Kum 1972 khan Mizoram UT sawrkar hnuaia Legislative Assembly hmasa berah Independent in Tuipang bial (tuna Palak bial ni ta) atanga thlantlin niin Deputy Speaker atan thlan a ni zui a, UT Sawrkar hnuaiah a bial ngai atang hian vawi 4 (1972, 1978, 1979 leh 1984) thlantlin niin 1979-ah hian Janata Party ticket-a thlantlin a ni a, a bak inthlan dangah hian Indian National Congress (INC) Ticket-a thlantlin a ni.
Mizoram State sawrkar hnuaiah kum 1987 leh 1989 khan Tuipang bial atang vek hian thlantlin leh niin kum 1989-90 chhung khan Assembly Speaker hna a lo chelh leh a. Kum 1990-1996 leh 1996-2002 ah te khan India ram rorelna sang ber Parliament (Rajya Sabha) ah Member a lo ni tawh bawk a, kum 2013 Assembly inthlan-ah Palak bial atanga thlantlin niin Assembly Speaker hna a chelh leh a, amaherawh chu kum 2018 Assembly Inthlan dawn khan BJP zawmin BJP Mizoram Pradesh-ah hian Core Committee Member nilai a ni bawk. Kum 1972 atanga 2018 thlenga Assembly inthlan tum 12 awmah tum 9 chuhin tum 7 a tling a, kum 2003 leh 2018-ah erawh a tlinglo ah a tang thung a ni.
Mizoram Governor PS. Sreedharan Pillai chuan Speaker hlui, Hiphei-a boral chu pawi a tih thu sawiin, Politics huang atanga rei tak ram rawngbawl a bawl hun chhung kha mipuite tana hruaitu nih tling leh mi ten amah a rinna an nghah ngamna a lo ni tawh thin tih a sawi a, dik taka ram hruai duh mi leh mipui vantlang rawngbawltu entawn tlak a nih thu a sawi bawk. BJP Mizoram Pradesh leh MNF Partypawhin Hiphei-a boral chu pawi an tih thu leh an ui thu thuchhuah siamin an tarlang bawk.

Comments

Chhiar Hlawhte