Latest News

Workers’ Welfare Board Member te Account-ah Rs. 3000/- theuh thun sak a ni dawn

Labour Employment, Skill Development & Entrepreneurship Department Minister, Lalchhandama Ralte chuan Workers’ Welfare member mi 50,000 chuang te chhawmdawlna turin Direct Benefit Transfer-in an Bank account-ah Rs. 3000/- theuh thun a ni dawn tih a sawi.
COVID-19 avanga Mizoram in harsatna a tawh mek chungchanga mipuite hnena nimin a thuchah a tihchhuah ah Labour Employment, Skill Development & Entrepreneurship Department Minister, Lalchhandama Ralte chuan he thu hi sawiin Workers’ Welfare member-te, kuthnathawka inhlawha hun hmang thin te chu tunah hian hnathawkin an chhuakvak thei lo tih sawiin, hei vang hian Board Meeting-in alo remtih tawh angin anmahni chhawmdawlna turin member 50,000 chuang an neih te chu an Bank Account-ah Rs. 3000/- theuh Direct Benefit Transfer-in Bank kaltlang leh Post Office kaltlangin karleh Thawhtanni, April ni 7 atangin an thun tan dawn tih a sawi a. Bank Account la tifel chiang tawklo te chu an awmna District Registering Officer te hnena a rang thei angin an account number te hriattir tur leh an kalchhuak theilo a nih pawhin whatsapp hmang te pawhin an account thlalak thawn turin a chah a, chumi hmang chuan Office lam atangin he chhawmdawlna hi reilote ah an thun dawn tih a sawi bawk.
LESD&E Minister chuan tunhnaia Free Ration sem chungchang pawh sawifiahin, LESDE Department hnuaiah 'Mizoram Building and Other Construction Workers’ Welfare Board' an neih thu leh chu chuan kan ram chhunga kuthnathawktute, building sak a inhlawh, mistiri, lung chher, kawng lai leh kawng chi hrang hranga kuthnathawktute a enkawl thu a sawi a. Heng mite tan hian building sakna te leh kawng laihna a contractor-te hian an Bill atangin 1% an chhunglut tih sawiin, hei hi 'Cess' tih a nih thu leh chu sum chu tuna COVID-19 doletna ah mipuite harsatna chhanchhuahna atan Board Meeting in ‘A theih ang angin i luangchhuak ang,’ a tih angin hma aa Free Ration sem a nih thu a sawi a.
Minister chuan Free Ration dawng thei te chu Workers’ Welfare Board hnuaia member, BPL chhungkua zawng zawng te, PHH member zawng zawng te leh APL (Ration Card var nei) zingah Local Task Force emaw, Village Level Task Force ten tun dinhmuna dawng awma an ngaih leh lehkha an ziah sak te a nih thu a sawi a. Heng mite Ration buhfai man hi Workers’ Welfare Board chuan a pek sak dawn thu leh tunah hian sum hmahruai cheng nuai 251 chu Supply Department-a pe tawhin rampum-a Free ration la te tihfel a nih hunah sum hi pek belh leh tur a nih thu a sawi a. Ration Card pakhat hnuaia awm zingah Welfare Board member pakhat aia tam an lo awm pawhin tum khat bak Free Ration hi dawn theih a ni lo tih pawh sawiin, tunah hian Free Ration semna atan hian cheng nuai 500 leh Board member-te inhlawhfa theilo tanpuina atan cheng nuai 1500, a vaiin cheng nuai 2000 ruahman a nih thu a sawi bawk.

Comments

Popular News (Last 30 Days)