Wholesale dawr te thil man tisang lo turin chah

Nimin khan Serchhip District COVID-19 Supply Chain Management Committee chuan Serchhip Bazar-a Wolesale dawr te enfiahin bungraw chhekkhawl an neih dan an enfiah.

Nimin a heng dawr hrang hrang an enfiahna ah hian sumdawngte chu an thil zawrhna rate te, bungraw lakkhawm chungchanga harsatna an neih leh neihloh te zawtin, sumdawng te chuan tun thlengin harsatna liantham an neih loh thu an sawi a, thilman erawh an lakna (Silchar) lamah tunhma aia a san tawh thu an sawi a. COVID-19 avanga harsatna thleng mekah an thil stock-sa man an tihsan loh thu leh dawr te lama an pekchhuahna pawh a san phah lemloh thu an sawi a. Thil then-khat erawh an lakna a to avanga a hma aia a man sang zui ve ta pawh a awm thu an sawi bawk.

Supply Chain Management Committee te chuan dawrkai-te chu mipui te harsatna thlen lo zawnga an bungrua te hralh tura an ngen bakah MRP aia sang-a hralh lo turin an chah bawk a ni.

Serchhip District COVID-19 Supply Chain Management Committee in nimin a heng dawr an enfiahna ah hian Legal Metrology, Inspector Supply Department-a Inspector leh District Consumer Association leh Sub-Hqrs. YMA aiawhte an tel a ni.