Mipuite hamthatna tura ruahman mipui ten sumfai a an dawn thuai theih dan tur sawihona neih a ni

Serchhip District Bawrhsap, Dr. Lalzirmawia Chhangte chuan nimin khan Serchhip District chhunga Bank hrang hrang aiawh thawktute kokhawmin, tunlaia hri leng avanga mipuite harsatna sutkianna tura sawrkar atanga hamthatna dawn tur hrang hrangte mipuiin sum faia an dawn thuai theih dan tur chungchang a sawipui.
Serchhip DC Conference Room-a he sawihona hunah hian District Bawrhsap chuan sawrkar Scheme hrang hrang- Pradhan Mantri Vijawala Yojona (PMUY), Pradhan Mantri Jan-Dhan Yojana (PMJDY) leh Mizoram Building and Other Construction Workers Welfare Board (MBOCWWB) in an memberte Rs. 3000/- theuh an account-a a thunsak turte chu a dawngtu tur ten sumfai-a an dawn ngei theih nan leh Bank kaltlanga an sum mamawhte an lakchhuah ngei theih dan tur sawipuiin, a bikin thingtlang miten an pawisa dawn tur a sum faiin hmu sela, hman loha awm mai mai lovin an mamawh phuhruk nan an hman ngei theih dan tur ngaihtuah sak a tul thu a sawi aa. District chhung khaw hrang hranga ATM Booth awmlohna khuate pawhin pawisa an lakchhuah ve theih dan tur ngaihtuah sak turin Bank hnathawkte a chah bawk a ni.
Heng sawrkar Scheme hrang hranga tanpuina dawngtu turte hming hi a rang thei ang bera lakkhawm a, Local Task Force kaltlanga a dawngtu turte hriattir nise tiin he huna tel te hian an rel a. Bank Account hman ngai tawh loh avanga beneficiary account-a pawisa lut theilo te pawh a rang thei bera siam that a nih theih nan Bank hnathawktuten hma an la dawn bawk a ni. Hei bakah hian beneficiary ten Bank atanga pawisa an lakchhuah theih nan Local Task Force te hman tangkai nise, Veng/Khua inchhawkin ruahmanna siam nise an ti bawk.
He thutkhawm ah hian Serchhip District chhunga Bank hrang hrang aiawhte bakah Addl. DC, HD. Lalpekmawia; SDO (Sadar) C. Lalduhzuali leh Serchhip BDO, Vanlalhmachhuana te pawh an tel bawk a ni.

Comments

Chhiar Hlawhte