Vairengte-ah COVID-19 vei rinhlelh an la awmlo

Kumin February ni 11 atanga Vairengte Check Gate-a COVID-19 endik hna kalpui a nih atangin COVID-19 vei rinhlehawm pakhatmah an la awm lo.

He thu hi nimin-a Vairengte-a COVID-19 endikna hmun te tlawhtu Kolasib DC, Dr. H. Lalthangliana chu Kolasib CMO, Dr. Lalhlimpuia chuan lo hrilhin February ni 11, 2020 atanga Check Gate-a COVID-19 Screening hna an kalpuina kawngah Vairengte khawtlangin a tul apiangah an lo pui thin chu lawmawm a tih thu a sawi a. Kolasib DC chuan COVID-19 hri darh zel tur ven leh mipuite nitin mamawh ngaihtuahpui chu Task Force ten an ngaih pawimawh ber a nih tur thu a sawi a, Essential Commodities hrang hrang phurtu lirthei te chu chelh khawtlai lova, a rang thei ang ber a kaltir thin a tul thu a sawi bawk.

Kolasib DC chuan COVID-19 hri laka khawtlang kan inkharkhip chhung hian mipuite nitin nunphung a phurrit siam belh lo zawng leh a theih chin chin ah harsatna awm te sutkian sak zawnga hma la turin thawktute chu a chah a, tun dinhmun ah Vairengte chu Mizoram mipuite eitur lakluhna hmun pawimawh ber a nih avangin tha thlah lova hma la zel turin a chah bawk a. Social Media kaltlang a mipui ti chi-ai thei thuziak thehdarh a ni thin chu pawi a tih thu pawh sawiin, hetiang thu belhchiandawllo darh tur venna kawngah mitin ten mawhphurna kan neih theuh thu a sawi bawk a. COVID-19 hlauh luat ah tullo in harsatna kan insiam belh theih thu pawh sawiin, fimkhur nachang leh fimkhurna kawng a inzirtirna neih a pawimawh thu a sawi bawk.