COVID-19 avangin Mizoram Jail hrang hranga tang mi 337 te chhuah lailawk an ni dawn

Mizoram chhunga lung In tang mi 337 te chu COVID-19 darh palh thei thu ah chhuah an ni a, heng zinga mi 289 te hi vawikhat thil tihsual avanga tang mek te niin heng mite hi Bail-a chhuah an ni.
Home Minister Lalchamliana chuan hemi chungchang hi sawifiahin, Supreme Court chuan COVID-19 hripui a darh palh hlauh thu-ah ramchhunga Jail te ti thawl tura a tih thu leh State tinah High Power Committee dinin Mizoram-ah pawh High Power Committee hi High Court Judge hova siam a nih thu a sawi a. He Committee rawtna ang hian lung In tang mek mi 337 chhuah an ni tih sawiin, “Keini chang kan ni lo a, India ram puipuiah Jail tih thawl nan lung In tangte hi a theih chinchin chhuah mek an ni. Heng mite hi vawikhat thil tihsual bail a chhuah mi 289 an ni dawn a, remission hmu mi 48 an ni dawn bawk a ni. An zavai hian mi 337 an ni dawn a ni,” a ti a. Mi thenkhat in an chhuah huk chuan a hlauhawm ang a tih ngaihdan te an nei a ni tih a hriat thu pawh sawiin, “Amaherawhchu, heng ho hi chu ti mai a tihdan phung pangngai awmlo a chhuah mai tur an ni lo tih ka sawi duh a. Mizoram-ah khawi Jail-ah mah hian COVID-19 positive hmuh a la ni lo tih bawk a, chuvang chuan chu ti taka hlauhthawn tur an awm a maw ni chu aw, ka ti deuh a ni,” a ti.
Home Minsiter chuan heng Jail atanga chhuah turte hi District Magistrate in Jail atangin an In thlengin an hruaichhuak ang tih pawh sawiin, chutah chuan ni 14 chhung Home Quarantine tih vek tur an ni tih a sawi a. Jail hrang hrang atanga an chhuah tir tur zinga mi 48 te chu Court in thiamloh a chantir tawh, an convict chhung hun engemaw zat hmang tawh te an nih thu sawiin, heng mite hi Central Jail, Aizawl atangin mi 20; District Jail, Aizawl atangin mi 4; District Jail, Lunglei atangin mi 5; District Jail, Siaha atangin mi 7; District Jail, Kolasib atangin mi 4, District Jail, Champhai atangin mi 2; District Jail, Lawngtlai atangin mi 1 leh District Jail, Mamit atangin mi 5 an ni tih a sawi a. Vawikhat thil tihsual avanga man, la tang mek te chu Bail a chhuah phal an nih angin mi 289 chhuah an ni dawn tih a sawi a. Chungte chu Aizawl District Court, Aizawl-ah mi 150, Champhai District Court, Champhai-ah mi 25, Kolasib District Court, Kolasib-ah mi 46, Serchhip District Court, Serchhip-ah mi 26, Mamit District Court, Mamit-ah mi 21, Lunglei District Court, Lunglei-ah mi 15, Siaha District Court, Siaha-ah mi 1 leh Lawngtlai District Court, Lawngtlai-ah mi 5 te an nih thu a sawi bawk.
Hei bakah hian Upa leh damlo engemaw zat bail a chhuah tur an ni bawk tih sawiin Home Minister chuan, Central Jail, Aizawl atangin 6, District Jail, Aizawl atangin 6, District Jail, Lunglei atangin 3, District Jail, Kolasib atangin 4 leh District Jail, Champhai atangin 6 an ni tih a sawi a. Heti chung hian Lunglei Jail chu ala tawt deuh hlek ni a hriat anih avangin lung In-a tang mi 4 chu Lawngtlai Jail-ah sawn tura tih an nih thu leh District Magistrate leh Police ten ruahmanna an siam dawn thu a sawi bawk.

Comments

Chhiar Hlawhte