Health Minister in Health Department-a thawkte a fuih

Health Minister, Dr. R. Lalthangliana chuan Mizoram-a Health Department-a thawk te chu chak tak leh chhel taka mahni hna theuh thawk zel tura ngenin a chah bawk.

Health Department-a thawktute hnena nimin a thuchah a tihchhuah ah Health Minister, Dr. R. Lalthangliana chuan COVID-19 vanga hun harsa khawvelin a tawh mek lai hian Health Department-a thawk te chuan an hna theuh tlin tak leh rim takin an thawk tih a hriat thu tarlangin, “Mahni nunna mai ni lovin in hmangaih, in chhungte nunna hial pawh thap tak meuh meuhin, in hna theuh rim takin inthawk mek tih ka hria a. Ka chawimawiin ka zah che u a, ka chhuang tak meuh che u a ni,” a ti a. An thawhrimna leh inpekna avangin mipuite fakna awka an dawng awl lo tih sawiin, “Health & Family Welfare Department chu dinhmun zahawm takah in dintir mek a. Chak tawk lo tak chunga nangmahni changtu, in Minister pawh in zarah ka mawi a, ka lawm takzet a ni,” a ti.

Health Minister chuan an Department chu thil hote ah mualpho der thei an ni tih pawh sawiin, engemaw palh zeuhah midang tana pawi nasa tak thlen theitu, mite nunna vawngtu an nihna chen a awm tih an hriat vek thu a sawi a, “Hetiang hun kan tawn mek lai hian in duhthusam, in mamawh te kan pek theih tawk lohna chin che u a awm tih ka hria a. A hrehawm pawh ka ti hle. Eng pawh nise, a theih ang angin in tan ka theihtawp ka chhuah ve zel a, in hmaah ka ding tlat a ni tih in hriat reng ka duh bawk a ni,” a ti a ni.

Health Minister, Dr. R. Lalthangliana chuan kan hripui beih mek, COVID-19 avang hian eng chen nge kan la buai dawn tih hriatthiam a har hle tih sawiin, rim lehzuala an thawh a ngai a nih pawhin Pathian rawngbawlna tak tak a ni tih hriaa, inpekna nasa tak, tuna an thawh mek dan ang a thawk chhunzawrn zel turin a ngen a, “Inthlahdah thiang kan ni ve lo a ni tih hrereng turin ka chah mawlh mawlh bawk che u a ni,” tiin engkim tithei Pathian hnenah an tan Zoram mipuite an tawngtai reng tih hre reng turin a chah bawk.