Union Health Minister hnenah COVID-19 dinhmun leh Mizoram mamawh hrang hrang thlen a ni

Union Health Minister, Dr. Harsh Vardhan hovin nimin khan India ram State hrang hranga Health Minister leh Health Department mi pawimawhte chuan Video Conferencing neiin COVID-19 do nana hmalakna leh inbuatsaih dan te an thlirho a, hmalak zel dan tur leh mamawh thil chi hrang hrangte an sawiho bawk.

He Video Conferencing-ah hian Mizoram Health Minister, Dr. R. Lalthangliana pawh telin tunlai hri leng meka Mizoram dinhmun leh mamawhte a thlen a. He hunah hian Dr. R. Lalthangliana chuan Zoram Medical College (ZMC)-a COVID-19 testing Laboratory din a nih theihna tura sawrkar laipuia Ministry of Health & Family Welfare (MoHFW), Indian Council of Medical Research (ICMR) leh National Institute of Virology (NIV), Pune te’n theihtawpa an puihna zarah COVID-19 test theihna Mizoram ngeiah a awm tak avangin lawmthu a sawi a. Kawng engkimah thurawn pawimawh tak tak rang taka Central sawrkarin a rawn pek thin avang leh harsatna phuhru tura tanpuina sum an rawn pek avangin lawmthu a sawi bawk.

Health Minister, Dr. R. Lalthangliana chuan Mizoram-in COVID-19 hneh tura a mamawh chi hrang hrang a thlen zingah Mizoram-in ZMC leh Aizawl Civil Hospital bak District Hospital dangahte ICU a neih thuai theih nan chak taka hmalakpui turin Union Health Minister a ngen a; Mizoram-in International Border KM 722 laia thui a neih avang leh thenawm State hrang hrangah COVID-19 vei hmuhchhuah an tam sawt tak avangin Screening test tih zung zung theih nan COVID-19 test-na rang chi -'Rapid Antibody tests' leh 'trunat tests' tam tawk pe turin a ngen a. PCR test Kits pawh thahnem tak pek belh leh thuai turin a dil bawk.

Heng bakah hian Mizoram chhunga District hrang hrangah mithiam – Microbiologists leh Epidemiologists te mamawh belh an nih thu pawh health Minister hian a thlen bakah, District hrang hrang tan Basic Life Support Ambulance (BLSA) mamawh a nih thu a thlen a. thawktute veivah zung zungna tur lirthei leh samples dahthatna Ice-lined Refrigerators (ILR)/Deep Freezers mamawh belh a nih thu pawh thlenin, National Health Mission leh Health Department-ah te Fund tam zawk pe turin a ngen a, COVID-19 enkawlna tur chhawngthum – Covid Care Centre (CCC), Dedicated Covid Health Centre (DCHC) leh Dedicated Covid Hospital (DCH) te siamna tura thil pawimawhte ngaihtuahpui zel turin a ngen bawk a. Health Minister hian heng a thu thlente hi chak taka bawhzui a nih theih nan lehkha ziakin a thawn zui nghal a ni.

He hunah hian Health Minister hi Health Secretary, H. Lalengmawia leh National Health Mission-a Mission Director, Dr. Eric Zomawia bakah Dr. Pachuau Lalmalsawma, SNO (COVID-19) te’n an tawiawm a ni.

Video Conferencing zawh hian Health Minister hian Aizawl khawchhung Veng hrang hranga Local task Force leh Police duty-te a tlawh kual nghal a, an inpekna leh thawhrimna avanga lawmthu hrilhin, ram leh hnam dam-khawchhuahna tura huaisen taka ke penchhuak te an ni tih a sawi a, tha thlah lova theihtawp chhuah chhunzawm turin a ngen nghal bawk.