MIZOFED in Khawlailung Kurtai an lei sak

Cooperation Minister, C. Lalrinsanga hmalakna in Serchhip District chhung Khawlailung khuaa Khawlailung Sugarcane Growers Association te tharchhuah Kurtai quintal 10 chu Ningani khan Local leh Village Level Task Force te kuta dahchhawn turin Cooperation Department hnuaia State Level Cooperative Society, MIZOFED Ltd. chuan a thartute kut atangin a lei.
Khawlailung Kurtai thartute hi chhungkaw 120 vel niin COVID-19 Lockdown leh Curfew avanga Kurtai hralhna lama harsatna an tawh chu sawrkar chuan a theih anga buaipuiin Ningani khan a thawhkhatna atan MIZOFED kaltlangin Qtl. 10 lei sak an ni a. Cooperation Minister chuan a tul anga hmalak chhunzawm dan tur pawh ruahmanna siam a nih tur thu a sawi bawk.
Agriculture leh Irrigation & Water Resources changtu Minister ni bawk, C. Lalrinsanga chuan tuna COVID-19 hrileng avanga khawvel pumin harsatna kan tawh mek karah hian Zofaten inlungrualna leh thawhhona tha kan neih bik zia a lo lang tih sawiin, chhum lo chat lova mipuite tana a lang lo lama thawktute inpekna ropui tak kan hmu chu chhuanawm a tih thu a sawi a. “Zoram mipuiten India ram mai ni lo, khawvel pum huap pawha he hripui dona kawnga Sawrkar thupek zawm that kawngah leh thuawihna kawnga nun entawntlak tak kan lantir hi a ropuiin a malsawm em em a. Harsatna leh hrehawm tuar chunga kan tanrual tlatna hi Pathian duhzawng a ni a. Kan awmhmun theuh atangin kan ram leh hnam tan Pathian i ko zel ang u,” a ti bawk.

Comments

Chhiar Hlawhte