Union Agriculture Minister hovin State Agriculture Minister ten harsatna thleng mek an sawiho

Union Minister for Agriculture & Farmers' Welfare, Narendra Singh Tomar hovin Nilaini tlai khan State hrang hranga Agriculture leh Supply Minister te chuan Video Conferencing kaltlangin meeting an nei.

He Meeting-ah hian Union Minister, Narendra Singh Tomar bakah Minister of State pahnih – Parshottambhai Rupala leh Kailash Choudhary te pawh telin rampumah kharkhipna kalpui mekah loneitute harsatna tawh mekte sawilangin State hrang hrang Minister ten an loneitute dinhmun, tharchhuah seng leh hralhchhuahna kawnga harsatna an tawh mek leh thlai chi thlakna atana mamawh hrang hrang an neih te an sawiho a. He hunah hian Mizoram atangin Agriculture Minister, C. Lalrinsanga pawh telin inkharkhipna kalpui tirh lamah loneituten harsatna tawkin an feh theilo tih a sawi a, amaherawh chu March ni 30-ah District tin-a DC leh DAO hote nena Meeting an neih chuan mahni lo-a feh tur leh hnathawk turte chu indang lova, an kal phalsak nise tia an rel thu a sawi a. Inkharkhipna avanga loneitute harsatna tawh leh mamawh an neih te thlenna tur Farmers' Helpline kalpui mek chu loneituten an tangkaipui hle tih a sawi a. Hetih rualin kharkhipna avangin Externally Aided Projects - IFAD in a fund, FOCUS leh FAO in a Fund, GEF hnuaia hna tanna tur an duan chu tan theih a nih loh thu a sawi bawk.

Inkharkhipna avangin loneitu ten Cash crops, a bik takin Sawthing, Aieng leh Fu an seng mek chu hlawhfaa rawih tur an awm loh avangte leh State danga thawnchhuah kawngah harsatna a awm avangin an seng hrih lo tih he hunah hian C. Lalrinsanga chuan a sawi a. Chutiang bawkin Oil Palm chingtu ten Oil Palm rah an hralhna hmun ber, Godrej Agrovet Private Limited Mill chu khar anih avangin a hralhna tur an neih loh thu leh Oil Palm chingtute hian cheng nuai 25 atanga nuai 30 vel an hloh tawh nia chhut a nih thu a sawi a. Oil Palm tharchhuaktu te hnenah Minimum Support Price pek dan tur nikum September thla-a an thlen chu Ministry in pawmpui turin Union Minister hi a ngen nghal bawk.

He hunah hian Mizoram Agriculture Minister hi Agriculture Department leh Horticulture Department hotute chuan an tawiawm a, tuna inkharkhipna avanga loneitute tharchhuah hralhna atan Sawrkar in Vegetable Supply Chain a kalpui dan te pawh he hunah hian sawilan niin Local Level Task Force te nen tanghoin chawhmeh leh thlai te mipui hnenah Home delivery-a semchhuah a nih dan te pawh he hunah hian an sawilang bawk a ni.