COVID-19 dona atan Task Group din belh zel a ni

Mizoram sawrkar chuan COVID-19 hripui darh zel tur ven nan Task Group thar din belh zelin April ni 30, 2020-a Task Group panga (5) a din nen Task Group hrang hrang 10 a awm dawn ta a ni.
Mizoram sawrkar hian 'Task Group on Media & Publicity' din tharin hetah hian Chairman atan I&PR Secretary, Sangdingliana chu ruat niin Member Secretary atan I&PR Director, Lallianpuii ruat a ni a. Member atan mi pathum – Lalthlamuana, CIO & Joint Secretary, ICT Department; Dr. Lalrokima Chenkual, Asst. Director (Trg.), DM&R Department leh H. Lalduhawma, SMEMO ruat an ni bawk a. COVID-19 kaihhnawiha sawrkar thupek leh thuchhuah hrang hrang bakah thuziak leh thuthar chi hrang hrang mipuite hriat tura tangkai an lakhawmin an zirchiang ang a, felfai takin an remkhawm bakah COVID-19 Daily Bulletin an siam ang.
Hei bakah hian 'Task Group on Documentation' din niin Chairman atan Planning Secretary, Dr. Vanlalramsanga ruat niin Member Secretary atan Economic & Statistic Deputy Director, B. Lalrinhlua ruat a ni a. Member pahnih – Lalduata, Asst. Director (Ops) DM&R Department leh Dr. Lalchhuanawma, Deputy Director, DHS ruat an ni a. COVID-19 leh lockdown chungchanga sawrkar hmalakna zawng zawng leh hemi kaihnawih thilpawimawh zawng zawng ziaka vawng thain document an siam ang.
'Task Group on Agricultural Input' pawh din niin Commissioner & Secretary, Agriculture Department, Lalhmingthanga chu Chairman niin Director, Agriculture (Crop Husbandry), Rohmingthanga Colney chu Member Secretary a ni a; Member-ah Dr. Elizabeth Saipari, Director, Horticulture Department; Dr. H. Saithantluanga, Director, Agriculture (Research & Extension) leh Lalrozama , Director, Sericulture Department te ruat an ni a. 'Task Group on Direct Benefit Transfer' pawh sawrkar chuan din tharin Finance-a Secretary, Lalthansanga chu Chairman niin LP. Lalchangkima, Regional Manager SLBC Convenor chu Member Secretary a ni a; Member atan Dr. Ankita Chakravarty, Director, Social Welfare & Tribal Affairs leh Vanlalpianpuii, Director, Women & Child Development te ruat an ni.
Hei bakah hian 'Task Group on International/State Boundaries' pawh din niin Mizoram DGP, SBK. Singh, chu Chairman niin Lalthiamsanga Sailo, Joint Secretary, Home Department chu Member Secretary a ni a; Member Invitees atan LH. Shanliana, IGP, Law & Order; Brig. Vinod S., DIG Assam Rifles leh Kuldeep Singh, DIG, BSF, Aizawl Sector ruat an ni. Heng Task Group te hi Disaster Management Act, 2005 hnuaia Section 22 (2) (g) & (h) tlawhchhana din an ni.

Comments

Chhiar Hlawhte