Tun thla ah ramkang a tam

Fire & Emergency Services, Mizoram chuan April ni 1 atanga ni 13 thleng khan Mizoram chhungah ramkang tum 80 zet an thelh mit tih an sawi.
Mizoram sawrkar hnuaia Fire & Emergency Services hian Mizoram hmun hrang hrangah Fire Station 14 neiin kangmei a lo chhuah in a thelh hna an thawk thin a, tun thla (April) chhung khan ramkang tam tak thelhin ramkang thelh tam ber, Lunglei Fire Station in tum 15 an thelh a, Lawngtlai Fire Station leh Kolasib Fire Station in tum 11 ve ve thelhin, Bawngkawn Fire Station hi tum 7 an thelh bawk.
Heng bakah hian Siaha Fire Station in tum 6 thelhin Khatla Fire Station in tum 5 an thelh a, Champhai Fire Station leh Aizawl Fire Station in tum 4 ve ve an thelh a, Serchhip Fire Station, Mamit Fire Station, ITI Fire Station leh Kilikawn Fire Station ten tum hnih theuh thelhin Tlabung Fire Station in tum khat an thelh bawk a, Vairengte Fire Station erawhin hemi chhung hian ramkang thelh an neilo thung.
Hetihlai hian Fire & Emergency Services hian ramri dep khua, Vairengte leh Bairabi a Essential commodities rawn phurtu motor leh Rel Wagon te COVID-19 laka Mizoram mipuite an him theih nan District thuneitu te nen tang-rualin damdawi hmanga phuh thianghlim (sanitization) thin a ni a. Hei bakah hian Quarantine area leh Screening area te pawh damdawi hmanga phuhin sanitize a ni bawk.
Fire & Emergency Services chuan ram kang lo awm chhan zingah hian inkharkhipna (lock-down) laia a ruka ram kal, fimkhur leh si lo te vang nia rinna a tam thu sawiin, huan/leipui hal avang leh mei nung ngaihsak zui loh vangte, vutduk sa paih fimkhur tawk loh vang te a ni bawk tih an sawi a. Hripui avanga ram-in harsatna a tawh mek lai hian kangmei tichhuak lo tur leh fimkhur turin mipuite chu an ngen nghal bawk.

Comments

Chhiar Hlawhte