Rampum-ah May 3 thleng Lockdown kalpui dawn

Prime Minister, Narendra Modi chuan COVID-19 darh tur venna atan thla thar, May 3 thleng rampumah inkharkhipna, Lockdown chu kalpui leh a nih dawn thu a sawi.
Nimin a ram mipuite hnena thuchah a sawi ah Prime Minister chuan India chuan khawvel puma hripui leng mek Coronavirus chu chak tak leh nghet takin a do chhunzawm mek zel tih sawiin, “In inkhuahkhirh theih vang te, intawrhna leh in inpekna vang tak meuhin corona in harsatna lian tham zawk a thlen tur lakah India hi a la inveng thei a. I ram, India ram chhanhim tur hian hrehawm nasa tak chhel takin i tuar a ni,” a ti a. Thla khat leh a chanve vel kalta a India ram nen dinhmun inang-a awm ram thenkhat chuan tunah han India aiin a let 25-30 velin he natna-ah case an nei tawh tih sawiin, midang nena inhlat a awm (Social Distancing) leh Inkharkhip (Lockdown) te chu kan hlawkpui hle tih a sawi a. He natna do tura State lam te a biakpawh reng thu leh inkharkhip chhunzawm an rawt vek thu sawiin, heng te ngaihtuahin May 3, 2020 thleng inkharkhip hi kalpui turin thutlukna siam a ngai ta tih a sawi.
Prime Minister chuan Coronavirus in ala thlenlohna hmuna a darhlohna atana hma la tura mipuite chu ngenin, “Veng te deuh pakhat a a natna kai pakhat an lo awm anih pawhin kan ngai pawimawhin kan ngaihven tur a ni a. Coronavirus vang hian vanduaithlak takin mi pakhat a lo thi anih pawhin kan fimkhurin kan ngaihven leh zual phah tur a ni,” a ti a. He hri darhzauna hmun (hotspots) vil uluk tur a nih thu sawiin, “A darhzauna hmun kan siamthar hlauh chuan kan thawhrimna ti thlawnin kan tawrhna a tizual thei dawn,” tiin he hri leng dona hi khirh leh khauh zawka kalpui a nih tur thu a sawi bawk.
April ni 20, 2020 thlengin Police Station zawng zawng, District zawng zawng leh State zawng zawngte zirchiangin inkharkhip hi awmze neia kalpui anih leh nihloh enfiah a nih dawn thu pawh sawiin Prime Minister chuan, “He enfiahna paltlang thei, hmalak hlawhtlinna hmun, hri darhzauna (hotspot) zing a chhiar telloh leh a darhzau hlauhawm lohna hmun nia langte chu April ni 20 atangin inthlahdul deuh phalsak dan ngaihtuah a ni ang,” tiin hei hi khawsak harsa zawkte ngaihtuah chunga tih a nih thu a sawi bawk.
Prime Minister chuan chhungkua-a kum upate, a bik takin natna benvawn neite enkawl uluk zual tura mipuite chu chahin, inkharkhipna a pumhlum-a zawm-a midang nena inhlat-a awm turte, Taksa natna dotu tichak tur te, Corona darh zel tur laka invenna atan Arogya Setu Mobile App hmang tur te, miharsa zawkte tanpui turte, sumdawnna leh Industry-ah midangte zah-a eizawnna tihtawp sak lo tur leh he natna do kawnga thawktute zahna lantir turte hi ram mipuite chu a chah bawk.

Comments

Chhiar Hlawhte