Latest News

Thli, ruah leh rial avangin Mizoram khaw 2-ah chenna In 100 chuang zet a chhia

Nimin zing khawvar hmaa thli, ruah leh rial nasa tak thawk in Hnathial District-a Pangzawl khua ah chenna In 75 zet a tichhia a, niminpiah tlai khan Mamit District chhunga Thinghlun khuaa Rial tla in chenna In 67 zet a dengchhe bawk.
Hnahthial atanga thu kan dawn danin nimin zing khawvar hma, zing dar 2:00 leh dar 3:00 inkar vel khan Pangzawl khua hi thli, ruah leh rial in nasa taka nuaiin chenna In 75 vel zet chu In chung siamthat ngaiin a chhiat phah a, Pangzawl khawchhung ah hian Veng hrang hrang 6 awmin heng Veng tinah hian Rial tla hian chenna In tihchhiat a nei vek a, chenna In pakhat chu a chung zawng zawng thlak vek ngaia chhiain, chenna In 5 te chu a chung zatve thlak ngai a ni bawk a, a dang zawng hi Rangva 4/5 thlak ngai te an ni hlawm a ni.
Heng In chhia te siamthat hnatlang hi nimin khan VC leh YMA te chuan an ko nghal a, heng In chhia siamthatna hmanrua te hi dawr-ah a ba-a an lak thu Pangzawl VCP, Lalrinawma chuan sawiin, heng bakah hian hnatlang senso dang nen Rs. 1,20,000/- vel zet an sen thu a sawi a, hnatlang te senso atan hian bialtu MLA, Dr. Vanlaltanpuia chuan Rs. 5500/- pein vanduaina tawkte tan hian sawrkar atangin tanpuina awm thei ang ang ngaihtuahpui a nih tur thu a sawi bawk. Heng vanduaina tawk te hi nimin vek khan Hnahthial SDC leh BDO hna chelh mektu, H. Lalramliana chuan a hmunah tlawhin vanduaina tawk te tan hian sawrkar atangin tanpuina awm thei ang te ngaihtuah a nih dawn thu sawiin, a tul anga hman turin Silpauline a pe bawk a ni.
Hetihlai hian Mamit District chhung Thinghlun khua ah pawh niminpiah tlai dar 4:00 vel khan Rial tla avangin chenna In 67 zet chu a chhe bawk a, Assam ramri dep-a awm Thinghlun khuaa rial tla avang hian In chhe zinga a tam zawk chu riah chhuahsan a ni a, tunlai hri leng avangin thalai te ramri-ah loh theih lohvin an duty a ngaih avangin heng Inchung chhia thawmtha tur pawh hian harsatna an tawk nasa hle nia thudawn a ni. Thinghlun khua hi Panhnah ngah khua niin Panhnah thahnem tak chu Rial hian a ti chhia a, khawtlang hruaitute chuan Panhnah cheng nuai 10 man vel zet Rial hian a denchhiat an rin thu an sawi bawk.

Comments

Popular News (Last 30 Days)