COVID-19 dona kawnga Health Department hmalakna hrang hrang Health Minister hova thlirho a ni

Health Minister Dr R.Lalthangliana hovin nimin khan Mizoram Legislative Assembly Annexe Conference Hall-ah Health Department leh a kaihhnawih pawl hrang hrang ten COVID-19 dona atana hma an lak dan te, hmalak an tum dan leh hmachhawp an neihte an thlirho.

He thlirhona hun kaihruaitu Health Minister, Dr. R. Lalthangliana chuan Health kaihhnawiha thawktu zawng zawng, sawrkar hnuaia thawk te leh Private-a thawkte tiamin fakawm a tih thu a sawi a. An thawhna peng tinah hneh takin an thawk theuh nia a hmuh thu leh tun dinhmunah ral hmatawnga beitute an nih angin an thawhrim zia leh hahzia pawh a hriatpui thu a sawi a. Mizoram chhung chauh ni lo, India ram hmun dang atangte pawhin COVID-19 dona a Mizoram hmalakna chuan fak a hlawh tih a sawi bawk.
He Meeting-ah hian ZMC ICU-a COVID-19 damlo enkawl mek dinhmun chu Medical Superintendent, Dr. HC. Laldina hnen atanga ngaihtlak niin April ni 4, 2020 atanga a khawsik a ziaawm tan thu te, a taksa-a Vital organs (Chuap, Lung, Kal leh a dangte) hnathawh pawh zawi zawia a that chhoh thu te, Ventilator phawi theih ni chiah rihlo mahse Oxygen pawh hniam zawka kal tir a nih tawh thu a sawi a. Damlo COVID-19 vei mek Test Sample hi ennawn leh turin April ni 5 khan thawnthlak a nih thu leh result nghah mek a nih thu a sawi bawk.
ZMC Microbiology Department-a Asst Professor, Dr. Gracy Laldinmawii, Core Committee on Setting up of COVID-19 Testing Laboratory-a Member Secretary ni lai pawhin ZMC-a COVID-19 test theihna Laboratory din a nih dan tlangpui he hunah hian a sawi a. March ni 23-a he Committee din a nih hnuah April ni 7, World Health Day ni tak ah a vawikhatna atan Sample 11 Test a nih thu a sawi bawk.
ZMC-ah hian February thla atangin Task Force on COVID-19 din a ni tawh a. He Committee-ah hian mithiamte member-ah dah niin Doctor, Nurse, Group D leh a kaihhawih dang zawng zawngte a khat tawka training pek reng an ni a. COVID-19 damlo enkawl mektu Doctor leh Nurse te hi a inchhawka an luh a ngaih avangin tun thleng hian mahni In-ah an la haw thei lo a, an riahna leh ei leh in turte damdawi In-ah hian buatsaih sak an ni.
He hunah hian Aizawl Civil Hospital Medical Superintendent, Dr. Lalhmuchhuaka chuan COVID-19 chungchanga Civil Hospital inbuatsaih dan sawiin, damdawi In leh a vel bleach a kah te, kutsilna siam belh leh hand sanitizer chhawp te, damlo kan khap (phalloh) leh damlo awmpuitu pakhat chauh awm an phalsak dan leh pawn lam atanga ei leh in pe lova Hospital chhungah awmpuitute tan pawh Hospital chaw buatsaih sak an nih thu a sawi a. OPD khar ni lo mahse tul zual lo chu kal lo turin mipui an ngen thu leh Doctor te englai pawha phone kaltlanga rawn theih tura an inrin reng thu a sawi a. ZMC a damlote Aizawl Civil Hospital-ah sawn phei an nih thu leh thawhhona tha tak neiin an inbe pawp reng tih a sawi bawk.
Mizoram Drug Dealer Association-a President, R. Thanglura pawhin Lockdown leh curfew kalpui mek a nih avanga damlo dang tam tak tana damdawi pawimawh chah thlen kawnga harsatna an tawh dan a sawi a. Health Minister tanpuina in Guwahati atangin damdawi te hi phur thlen tan a nih thu leh Diabetes damdawi leh dialysis atana hmanraw mamawh te pawh sawrkar in ruahmanna siamin Aizawl-ah phur thlen a ni tih sawiin, District danga heng damdawi mamawh te phurh thlen a nih theih nan COVID-19 Task Group on Transport te nen tangho a hmalak nise an ti a. Dr. Lalsawma, Joint Director, Food and Drugs bakah Mizoram Pharmacist Association President pawhin damloten damdawi an hmuh theihna tura ruahmanna an siam te a sawi bawk.

Comments

Chhiar Hlawhte