Tangkhang 2839 awm mek

COVID-19 hri leng avanga inkharkhipna kalpui mekah Mizoram chhungah India rampawn mi 47 tiamin state pawn mi tangkhang 2,839 an awm mek a, State pawnah Mizoram mi 2,576 an tangkhang bawk

Mizoram Sawrkar-in inkharkhip avanga tangkhangte buaipui tura March ni 30-a a din, Task Group on Migrant Workers and Stranded Travellers chuan Mizoram chhung leh State dang, Foreign thlengin Mizoram khua leh tui tangkhang te a buaipui mek a. Tun din-hmunah Mizoram chhunga ramdang leh State dang mi hnathawk leh zin vei vak tangkhang mek mi 2839 an awm a, an zingah hian foreigner mi 47 an tel a. Hriat theih chinah Mizoram mi 2,576 ram pawnah an tangkhang mek a, he'ng zingah hian India ram pawn a tangkhang mi 185 an tel bawk a ni.

Sawrkar laipuiin ruahmanna a siamah chuan State tinin anmahni State chhunga tang-khangte, mi tu pawh harsatna nei chu lo tuam-hlawmin an mamawh dan a zirin ei leh in leh chenna tur a pe tur tih a ni a. Chumi atan chuan SDRF sum pawh hman tura ruahman a ni. Sawr-kar laipui thuchhuah bawhzuiin Mizoram chhunga tangkhangte hi a tul angin Mizoram Sawrkar chuan State Level Task Force, District Level Task Force, Local/Village Level Task Force, Koh-hran leh NGO hrang hrangte nen tangkawpin hma a la a ni.

Hetiang bawk hian Mizoram pawna awm te report dawn apiang chu a theih ang anga buaipui an ni a. Anmahni hming leh an awmna, an harsatnate ziak chhuakin Mizoram Chief Secretary chuan Sawrkar laipui thuchhuak tlawh-chhanin an awmna State Chief Secretary theuhte hnenah a tul anga lo buaipui turin lehkha a thawn zel a. State thenkhat chuan hma la in Mizoram mi leh sa tangkhangte hi a tul anga an lo buaipui dan te pawh an rawn hriattir thin a ni.