COVID-19 Medical Operational Team in COVID-19 dona kawnga hmalak dan an zir mek

Mizoram khawchhak lam tlawha zin mek, COVID-19 Medical Operational Team te chuan nimin khan Hnahlan khaw tlangdung ramri depa khaw hrang hrangte leh Sialkal tlangdung khuate tlawhin, COVID-19 dona kawnga hmalakna te leh inbuatsaihna te an thlirho a. Heng an zinna-a an thil hmuh atang hian sawrkar-ah rawtna an thlen leh dawn a ni.

Health & Family Welfare Board Vice Chairman, Dr. ZR. Thiamsanga MLA kaihhruai COVID-19 Medical Operational Team te hian nimin khan Hnahlan khua tlawhin Hnahlan VC House-ah Hnahlan VLTF nen inkawmna an nei a, he hunah hian Dr. ZR. Thiamsanga chuan Sawrkar ruahmanna in COVID-19 Medical Operational Team pali (4) din anih thu leh an tum ber chu Mizoram puma COVID-19 dona kawnga hmalakna zirchiante, mipuite hnena zirtirna pek leh damlo awm thulh pawha enkawla, sawngbawl thlenga ruahmanna felfai tak siam turte, a tul ang zela sawrkara thurawn thlen thin tura duan anih thu a sawi a. Hri leng vanga kan ramin harsatna nasa zawk a tawh lohna tura kan ralthuam tha ber chu lo invenlawk a nih thu sawiin, “A taka thawktu tak takte chu VLTF leh tlawmngai pawl te an ni a, in harsatna te enfiaha lawmthu sawi tura lokal kan ni,” a ti.
COVID-19 Medical Operational Team te kaihruaitu Dr. ZR. Thiamsanga chuan Champhai District chu ramri thui tak nei anih vangin venhim pawh a hautak hle tih sawiin, sawrkarin a tul ang zela puih a tum thu a sawi a, ramri daido a awmte chu theihtawp chhuah chhunzawm zela natna kai tanna leh tidarhtu nih tum lo tura tan la sauh sauh turin a chah a. Ral hmatawnga ding thin hriselna lama thawktute, Police, Village Level Task Force te, Media-te leh mimal, pawl leh Kohhran inphal taka tanpuina thawhtute leh PPE siamtu mi thahnemngai tak takte chhuanawm a tih thu sawiin, Saitual, Khawzawl leh Champhai District-te endik tawh chinah lungawithlak leh fakawm a tih thu a sawi bawk.
COVID-19 Medical Operational Team Chairman chuan hrileng ven hna chu Health Department mal chauh tih theih a nih loh thu leh kan zavaia thawhho ngai a nih thu sawiin, COVID-19 veite enkawlna tura ruat Hospital, Zoram Medical College-ah Covid-19 test-na khawl bunfel niin, Sample te test thin anih thu a sawi a. Hmanraw mamawhte pawh chah thlen teuh tawh niin, mamawh ang te ngaihtuah zel a nih thu a sawi a. India ram hmun danga tangkhang te rawn haw hunte pawh a la awm ang tih sawiin, “Mizoram lut turte rang taka test theihna tur hmanrua 10,000, Surgical Mask 100,000, N95 10,000, Glove 100,000, Thermal Scanner 230 chuang chah mek niin, PPE 5000-6000 neih mek a ni a, mamawh dan anga chah zel tur a ni,” a ti a. Mipuite chu ram leh hnam chhanna tura tlawmngaih chhuaha, natna ven kawngah theih-tawp chhuah turin a chah bawk.
COVID-19 Medical Operational Team te hian niminpiah khan Champhai tlawhin Cham-phai District Level Task Force on COVID-19 te an kawm bawk a. He hunah hian Dr. ZR. Thiamsanga chuan Mizoram sawrkar in pheikhai rual leh chak zawka COVID-19 beihlet anih theihna turin Medical Operation Team 4,  Indian Medical Association,  Mizoram Government Doctor Association leh Private lama thawkte awmkhawmna a din thu sawiin, Mizoram  hmun hrang hrangte tlawh mekin, an dinhmunte zirchian mek anih thu leh zirchianna atangin Sawrkar ah thurawn thlen tura tih an nih thu a sawi a. Mizo-ram chuan COVID-19 dona kawngah khawtlai lovin hma a lak vat thu sawiin, India rampuma inkharkhip  puan hma ni 3 ah puan a ni a, Airport pawh a khar hmasa ber pawl kan ni, a ti a. Party anga inthliarna awm lova ram hruaitute leh department hrang hrang hotute, Village/Local Level Task Force, NGO, VC leh Media te'n mahni phaktawk theuhah  theihtawp an chhuah thu sawiin, “India rama lockdown kalpui tha ber kan ni hial a ni,” a ti bawk.

Comments

Chhiar Hlawhte