Home Minister in Phaisen BOP leh Vairengte-a Screening Point a tlawh

Home Minister, Lalchamliana chuan nimin khan Phaisen Border Outpost leh Vairengte a Screening Point leh Check Gate te a tlawh.
Home Minister Lalchamliana hian niminpiah lama Mamit District leh Bairabi khuaa ramri venhimna hmun te a tlawh hnuah nimin khan COVID-19 avanga inkharkhipna neih mek chhunga Kolasib District-a ramri hrul venghimtute duty-na hmun a tlawh leh a, Home Minister hian Phaisen Border Out-Post tlawhin hetah hian Phaisen Village Level Task Force te nen inkawm in ramri dep a Mizoram Police leh Task Force duty-te inpekna leh hmalakna ah Home Minister chuan lawmthu a sawi a, ram venhim nana khawtlanga lungrual taka thawhhona awm thin chu Mizo nih tinuam tu a ni, a ti. Home Minister chuan COVID-19 hri len hun chhung tur hriat a nih loh avangin hahdam zawka duty dan ruahman thiam turin a chah a, duty te mamawh ang Mask, Glove leh Protective Suit a hlan bawk a ni. He hunah hian Home Minister tawiawmtu Neihchungnunga, IPS, DIG (CID) pawhin ramri-a duty te chu COVID-19 hri laka inven dan hrang hrang hriattur pawimawh te zawm a, fimkhur tak a duty turin a chah bawk.
Hemi hnu hian Home Minister hian Vairengte Screening point leh Check Gate tlawh lehin Motor lian, permit nghaka Gate bula tangkhang thahnem tak awm thin chu khawtlang tan him lo a an ngaih thu Vairengte Task Force hruaitute chuan Minister hnenah hian an lo thlen a. Home Minister chuan hemi chungchang ah hian Home Department Secretary be nghalin Vairengte Check Gate-a lirtheite chu rang zawka Gate an paltlang zung zung theih nan ruahmanna siam a nih tur thu a sawi a ni. Hei bakah hian Home Minister hian Police leh Task Force, ramri dep a duty te hman tur invenhimna hmanrua engemaw zat a pe nghal bawk a ni.

Comments

Chhiar Hlawhte