SWD Minister in Siaha bial chhung a tlawh

Social Welfare Minister leh Siaha bialtu MLA, Dr. K. Beichhua chuan nimin zing khan Civil Hospital, Siaha tlawhin, COVID-19 laka invenna leh ruahmanna hrang hrangte a hmunah a enfiah.

He hunah hian Siaha CMO leh Medical Superintendent ten Minister hi COVID-19 thleng palh thei laka inven dan, inenkawl zuina leh ruahmanna hrang hrang an siam te an hrilh bakah hmalak la tulna te an lo hrilh a, duhthusam angin ruahmanna la awm thei lo mahse tun dinhmunah Siaha Civil Hospital inbuatsaihna leh ruahmanna hi tha tawk hle a ngaih a ni. Hospital-ah hian COVID-19 Casualty, 20 Bedded-Isolation Ward, 5 Bedded -ICU leh Preparation & Changing Room te siam fel vek tawh a ni.

Minister chuan Siaha khawchhung Veng hrang hranga COVID-19 Local Task Forces Duty Post te tlawhin, Task Force Duty te thawhrimna leh inpekna ropui tak avangin lawmthu a hrilh a, tun ang zela inthladah miah lova he rawngbawl hna hi thawk chhunzawm zel turin a chah a, “He hri hlauhawm tak hi lo thleng thut a nih avangin inven lawk a ruahmanna lo siam lawk thei a ni lova. Chuvangin sawrkar, NGO’s leh VC ten tlachawpa rilru fim tak leh thukhat vua-a rem kan ruat hi kan hmalak theihna awmchhun a ni ber mai a, nang leh kei inti lovin leh Political Party inthliarna awm miah lova thawktlang tur kan ni,” a ti.

He hri lakah hian tih tur pawimawh em em pahnih kan nei tih pawh sawiin Dr. K. Beichhua chuan, “Pakhatna-ah chuan fimkhur taka theihtawp chhuaha inven a ni a, pahnihna-ah chuan khawvel Economy tlusawp vek tur hmachhawn mai thei leh tam mai thei dinhmunah kan ding thuai dawn a, hemi laka kan him theihnan lo leh huan lamah kuthnathawh i uar ang u. State dang atanga Supply kan hmuh a tawp hunah chhuanchham a kan awm loh nan veng tin leh khaw tinte hetiang lamah ruahmanna siam thuai ang u. Kan hun tawng mek hian eng chen nge a awh dawn kan hre lo, chuvangin Task Force leh Sawrkar chuan Management thiam takin kan kalpui a tul. Kan essential Commodities neih ang ang te pawh renchem taka kan hman thiam a ngai hle ang,” a ti bawk.

Social Welfare Minister chuan mipuite chu thlaphang lo tura chahin, “CM Relief Fund te pawh a lo la thleng dawn, Disaster Management fund te pawh kan dil belh zel ang, a tul chuan kan MLA Fund te pawh kan hmang vek mai ang. Amaherawh chu engtianga rei nge kan inkharkhip dawn tih a la hriat si loh avangin, Sawrkar chuan ei leh barah inrenchem taka kan neih sa te kan hmanthiam a duh hle a, tanpuina pek kawngah pawh vawikhata Ki sang taka rik nghal bawrh bawrh ai chuan inremchem takin, kan hmalam huna mamawhna sang tak awm theih thlir renga chet hi a duhdan a ni.” a ti bawk.