Prime Minister hova Chief Minister Meeting in April 30 thleng Lockdown la kalpui zel an rel

India Prime Minister, Narendra Modi chuan ramchhunga State hrang hrang zingah a tam zawkin inkharkhipna kalpui zel an duh angin chawlhkar hnih (2) chhung dang inkharkhipna kalpui turin ruahmanna siam a nih tur thu sawiin, hri leng avanga ei leh bar lamin nasa taka a tawrh phah chu tiziaawm tura hma la turin State te a chah bawk.

COVID-19 hripui leng mek avanga India rampuma inkharkhipna (Lockdown) kalpui mekah nimin khan Prime Minister, Narendra Modi chuan India rama State Chief Minister te leh Union Territory hrang hranga Lt. Governor te chu Video Conference kaltlangin a kawm a. State hrang hranga hmalak dan te leh kal zel an duh dan te ngaithlain, Prime Minister chuan a tam zawkin inkharkhipna kalpui zel an duh angin chawlhkar hnih (2) chhung dang kalpui turin ruahmanna siam a nih tur thu a sawi a. Prime Minister chuan hrileng avanga ei leh bar lamin nasa taka a tawrh phah chu tiziaawm tur leh, thawktute hriselna ngaihtuah chung zela hmalak ni se tiin State te a chah a. Industry-te chuan an mi rawihte tan an hnathawhna hmunah ei leh in bakah riahhmun buatsaih theih dan te, Black market leh bungraw chheprelh a awmloh nana hmalak a pawimawh thu te sawiin, Agriculture lam ngaih pawimawh a tul thu a sawi bawk.

Video Conference-ah hian Mizoram atangin Chief Minister, Zoramthanga pawh telin, Health Minister Dr. R. Lalthangliana, Home Minister Lalchamliana, Chief Secretary Lalnunmawia Chuaungo leh Home Secretary, Health Secretary leh Director General of Police ten an tawiawm a. He hunah hian hripui leng avanga harsatna tawk nasa lehzual, a vei tamna leh thi awmna State Chief Minister te chu thu sawina hun pek niin Hripui donaa an hmalakna leh dinhmunte bakah hmabak la awmte an sawi hlawm a, State 10 chuang ten thu sawiin, Mizoram chuan case pakhat chauh a la neih avangin a sawi ve lo State zingah a tel a ni.

He Video Conference zawh hian Chief Minister, Zoramthanga chuan phalna nei lova ramri kan chungchangah khauh taka ramri ven hna thawk turin Home Department hotute a hrilh a. He natna hrileng do hneh tur chuan mipuite kan zavaia kan tanrual a tul thu a sawi bawk.