Chanchin thar thenkhat :

Kanhmun-ah bungrua thawn

Mizoram khawthlanglam-a Kanhmun hnaih tak, Tripura State chhungah COVID-19 vei an hmuhchhuah hnuah Health Minister, Dr. R. Lal-thangliana hmalakna in nimin khan Kanhmun-a COVID-19 hri leng avanga venhim hna thawktute hman turin hmanraw hrang hrang - Masks, Kut-kawr, Kut tihfaina leh hmanraw dang te thawn thlak a ni a, heng bungrua thawnthlak te hi Bleaching Powder Bag 1, Hand Sanitizer litre 10, Gloves (Rubber kutkawr) pair 200, 3 Layer Masks 50, PPE 50, N-95 Masks 100, Protective Goggles 50 leh Silpauline 10 te a ni.

Kolasib-a hmalakna hrilh
Kolasib DC, Dr. H. Lalthlangliana chuan nimin khan a Pisa-ah Kolasib-a thuthar thehdarhtute kawmin COVID-19 dona kawnga an hmalakna kal mek te a hrilh a, he hunah hian Kolasib DC chuan Vairengte leh Bairabi National Highway a Screening Gate siamah te motor leh bungrua tih thianghlimna (sanitised) kalpui a nih thu te leh ramri hrul a Task Force duty te chu ngaih pawimawh bik an nih thu a sawi a. Phalna la lova ramri kan a lo let, Task Force ten enthlak tur a an dah hran mi 50 vel chu Polytechnic, Thingdawl-ah an awmna tur ruahman a nih thu leh Tlawng lui-a hmun pawimawh zual-ah tlaivar-a duty indah a nih thu a sawi bawk.

AH&Vety Deptt. in hma la zel
AH&Vety Department chuan COVID-19 Lockdown chhung leh a hnulam-ah Mizo mipui ten sa thianghlim leh tharlam tak kan ei theih nan theihtawp chhuaha hma la zelin Zirtawpni khan AH&Vety Department Jt. Director, Dr. Lalchung-nunga Pudaite leh Deputy Director, Dr. Lalrotluanga Sailo te chu hmun hrang hranga Ar puahna hmun tlawhin Ar an sawngbawl dan a tianghlim tawk leh tawk loh te, Ar damlo leh thisa te Supply Chain a a luh leh luh loh te an endik a. A tlangpui thu in AMPFA member te Ar puahna hmun hi a tha thawkhat hle a, duhthusam ni rihlo mahse tun dinhmun atan chuan a him tawk hle niin an sawi.

ZPM MLA in Bairabi tlawh
ZPM Legislature Party-a Dy. Leader, Van-lalhlana leh MLA, Lalchhuanthanga te chuan nimin khan Bairabi tlawhin State pawn atanga lo lutte ven hna Village Task Force- ten an thawh dan chu fak-awm an tih thu sawiin, Police leh Truck driver te erawh ngaihsak an ngai tih an sawi a. FCI Godown-a buhfai phurh tur chang Truck 250 - 300 vel Driver te chu Office te reuh te ah an awmkhawm luai luai a ngaih vangin Social Distancing tih ngaihna a awm lo nia sawiin, hrileng kai an awm palh chuan inkai-darh a awlsam dawn avangin ruahmanna fel zawk an mamawh nia a hmuh thu a sawi. Hei bakah hian Inner Line Reserve chhunga Mosque sak mek pawh an tlawh nghal bawk.

TV kaltlangin zirtirna pe dawn
COVID-19 leng avangin India ram pumah Lockdown hman mek a ni a, School luh hunah pawh Zirlaite an luh theih tak loh avangin School Education Department chuan TV hmanga zirtirna pek chhuah dan tur ruahmanna an siam a. He ruahmanna hi naktuk, Thawhtanni atanga kalpui tur niin Doordarshan Kendra Aizawl-ah Thawh-tanni atanga Inrinni thlengin tlai dar 3:05 apiangin darkar chanve chhung naupangte zirtirna tur tih-chhuah thin a ni dawn a ni. A bultan nan Class X zirlai Science leh Mathematics zirtirna tihchhuah a ni ang. Zirlaite chu he programme hi lo thlir a, note book leh pen nen inchhawp a, a pawimawh lai apiang lo chhinchhiah ve zel tura beisei an ni. 
Lockdown chhung hi hri leng a reh fel hma chu pawhsei zel theih anih avangin zirlaiten he hun hi ngai pawimawh tur leh, nu leh pa te pawhin lo ngaihven pui turin Department hotute chuan an ngen a ni.

Zirlai mi 8 hruaihaw an ni
Lengteng bialtu MLA, L. Thangmawia hma-lakna in a bial chhung mi, Manipur-a lehkha zir a awm te chu Mizoram-ah hruailuh an ni. Thu-dawn danin heng zirlai mi 8, Mipa 6 leh Hmei-chhia 2 te hi Manipur-a an awmna Hostel khar sak an nih avanga hun engemaw chen an tangkhang a, hemi hnu hian ke-a rawn kalin Mimbung dai an rawn thleng a, Mimbung khawdai-ah hian ramri khar a nih avangin khua an luh phal lovin dai-ah zankhat an riak a, heng mite chanchin hi Lengteng bialtu MLA hian ngaihvenin sawrkar thuneitute hnenah thil awmdan hrilh pahin Mizoram-a an lo luh theih nan a ngen sak a.Hemi hnu hian sawrkar thuneitute remruatna angin Mimbung khuaa quarantine na hmun tura ruahmanah an vai hian dah an ni zui ta a ni. Hemi hnu hian MLA hian a bial chhung khaw hrang hrang tlawhkual nghalin VLTF duty te mamawh leh damdawi In mamawh te a sem nghal bawk a ni.

Comments

Chhiar Hlawhte