Sa leh a kaihhnawih-ah sawrkar in hma la mek ze

Mizoram sawrkar chuan COVID-19 Lockdown chhunga Mizo-ram mipuiin Sa, Artui, Bawnghnute, Ran chaw leh Veterinary service te khaihlak lova an hmuh theihna turin chak takin hma a la mek.

Mizoram sawrkar hian COVID-19 Lockdown chhunga hemi kawnga hma la tur hian March 31, 2020 khan 'Task Group on Animal Husbandry & Veterinary Services and Fisheries' chu AH&Vety Department-a Secretary, C. Lalpeksanga kaihhruaina hnuaiah a din a, task Group tanpui tur hian 'Directorate Level Task Force' chu AH&Vetry Department Director, Dr. Hmarkunga kaihhruaina hnuaiah din leh a ni bawk a, heng an hmalakna hrang hrang te hi nimin khan AH&Vety Minister, Dr. K. Beichhua hovin SEDP hnuaia Animal Husbandry &Veterinary, Fishery & Sericulture Board chuan an thlirho a ni.

Task Group on Animal Husbandry & Veterinary Services and Fisheries hmalakna hnuaiah hian All Mizoram Poultry Farmers' Association (AMPFA) leh Local Task Force te nen tangho in Poultry (Arsa) Meat Supply Chain mumal tak siamin, AMPFA hian an Member te atanga Ar lakhawmin an puah a, hei hi AH&Vety Department Task Force te'n lakhawm veleh in Local Task Force te hnenah an mamawh anga semchhuah a nih bakah Supply Chain hi a khaihlak loh nan ZPDS Hatchery leh Angels Hatchery, Lengpui te pawh Hatching ti chhunzawm tura hriattir an ni bawk.

Hetihlai hian Mizoram in Bawng a lakluhna ber, Myanmar chu tun dinhmunah Bawng lo lut tur Indo-Myanmar ramri-ah dan a nih avangin Bawngsa supply hi a chatlak mai thei dawna a lan avangin Cross Border Cattle Trader te nen thawhho dan tur ruahmanna siam a ni a. COVID-19 hi Bawng leh ran dangin an put darh loh avangin Home Department te nen Bawng loluh theih dan tur a rang thei ang bera sawiho tum a ni a. Vawksa (Pork) Supply Chain pawh mumal taka ruahman niin ran talh phalna (butcher license) nei te tan AH & Vety Department hnuaia ran talhna (slaughter house) te chu Bawng leh Vawk talh nan hawn a ni bawk.

Sangha (Fish) Supply Chain pawh ruahman niin tun dinhmunah Sangha hralhchhuah tur Mizoram-ah a awm loh avangin Fisheries Department-in State dang leh Mizoram chhung atanga supply thei tur a zawng mek a. Ran chaw (Animal Feed) Supply Chain pawh ruahman a ni a, hemi atan hian Whatsapp Group siamin ran chaw zuartu (animal feed dealer) te nen thawhho dan tur ruahmanna fel tak siam a ni a. Ran natna ah Emergency case khawih thei turin Veterinary Hospital leh Dispensaries te hawn a nih bakah Bawng leh Vawk kahrai (Artificial Insemination Service) pawh a pangngaia kalpui zel tura ruahman a ni bawk.