Latest News

MZI hruaitu thlanna nei

Mizo Zaimi Inzawmkhawm (MZI) Hqrs. Serchhip chuan nimin khan kum 2021-2022 chhunga an hruaitu tur thlanna MJA Serchhip District kaihhruaiin an nei a, President-ah Otto K. Lalchhuanawma (P&E Veng); Vice President-ah Lalramnghaka Kawlni (Tuikhuah Veng); Secretary-ah C. Zodinthara (Leisang Veng); Asst. Secretary-ah R. Lalrinfela (Bazar Veng); Treasurer-ah Lalnunsiami Khiangte (P&E Veng) leh Fin. Secretary-ah Johny Lalhruaitluanga (Venglai) te thlan an ni.

CM Relief fund semchhuah tan a ni dawn

Tunhnaia COVID-19 dona atana Chief Minister’s Relief Fund chhunluh te chu a thawhkhatna atan semchhuah a ni dawn.
Chief Minister’s Relief Fund hman dan tur ngaihtuahtu atana din, Committee on Utilization of Chief Minister’s Relief Fund for COVID-19 hi nimin khan an Chairman Chief Secretary, Lalnunmawia Chuaungo hovin CS Conference Hall, Aizawl-ah an thukhawm a, he Meeting hian Chief Minister’s Relief Fund semchhuah dan tur hi relin, CM Relief fund hi thuang thum (3)-a sem tura ruahman a ni.
He huna ruahmanna an siam dan chuan Mizoram khua leh veng tinah Village leh Local Level Task Force 889 din a ni a. Heng Task Force te tan hian sum fai cheng nuai 88.9 semchhuah a ni dawn a. Lawipu, Rangvamual leh Edenthar-a BSUP Complex-a cheng chhungkaw 600 te chhawmdawl nan Local Level Task Force te kaltlangin cheng nuai 6 sem a ni anga. Mizoram hmun hrang hranga Home, Rehabilitation Centre, Orphanage leh Centre hrang hrang 67 awm mekah tanpuina sumfai cheng nuai 23.65 pek chhuah a ni dawn bawk a. Heti hian CM Relief Fund on COVID-19 semchhuah hmasak ber tur hi a vaiin cheng nuai 118.55 a ni a. Committee on Utilization of Chief Minister’s Relief Fund for COVID-19 rawtna ang hian a rang thei ang berin sum hi sem chhuah a ni ang.

Comments

Chhiar Hlawhte