Latest News

President in Governor leh Lt. Governor te kawmin Mizoram mamawh pawimawh a thlen nghal

India President, Ram Nath Kovind chuan nimin khan Video Conference kaltlangin State leh Union Territory a Governor leh Lt. Governor zawng zawng te kawmin COVID-19 dona kawnga an hmalak mek chungchang a sawipui a. He hunah hian Mizoram Governor P.S. Sreedharan Pillai pawhin Mizoram mamawh pawimawh zual te a thlen nghal a ni.

India Vice President, M.Venkaiah Naidu kaihhruai Video Conferencing-ah hian India President, Ram Nath Kovind chuan COVID-19 dona kawngah tha thlah a thiang lo tih sawiin, nasa zawka tan lak chhunzawm a tul thu a sawi a. Tunhnai Delhi Nizamuddin Veng-a Sakhaw pakhat puipunna avanga hrileng darh thut chu thil pawi tak a ni tih sawiin, Hri leng darh zel tur dona kawngah Sakhaw hrang hrang betute mawhphurhna san zia a tilang chiang hle a ni, a ti. President chuan ramchhunga Governor leh Lt. Governor te chu an State chhunga thil thleng leh hmalakna te uluk taka vil leh hrechhiang tura chahin, Sakhaw hruaitute leh NGO hruaitute pawh mipui zirtirna kawngah an mawhphurhna te hrilh hre turin a chah bawk a ni. 
He hunah hian Vice President, M. Venkaiah Naidu pawhin thu sawiin Governor leh Lt. Governor te chu Video Conferencing hmasa lama a lo chah tawh te chak taka bawhzui chhunzawm turin a chah a. State chhunga Lockdown avanga harsatna lo thleng a awm pawhin State thuneitute hmalakpui vat turin a chah a. Mipui nitin mamawh ang chi te chatlak lova pekchhuah a nih theihna tur leh loneitute’n harsatna an nei a nih pawha tanpui dan kawng dapsak vat turin a hriattir bawk a ni.
Nimin a Video Conferencing-ah hian State tin-a Governor leh Union Territory-a Lt. Governor te chu thusawina hun minute 6 theuh pek an ni a. He hunah hian Mizoram Governor, P.S. Sreedharan Pillai chuan Mizoram chu he natna hrileng mek, COVID-19 dona kawngah a harh hmasa pawl a nih thu a sawi a. Prime Minister Narendra Modi in Janata Curfew a puan hma karhnih vel atangin chak taka hmalak tan a nih thu leh Lockdown kalpui a nih hnuah pawh hmun-dang angin sawrkar ruahmanna kalh zawnga hma la tumah an awm loh thu leh Lockdown pawh duhkhawp lovin fimkhur ngaizual bik District-ah te chuan Curfew puan a ni chhunzawm tih a sawi a. Lockdown leh Curfew chu mipuiin a thlawp tha hle a; Kohhran lam pawhin sawrkar hma-lakna te an thlawp pum hlum a, Biak In-ah inkhawm te ti tawpin puipunna programme zawng zawng pawh a ti tawp nghal vek a ni, a ti.
Nitin mamawh thil semchhuah kawnga hmalakna ah tun thlengin khaihlak a awm lo tih pawh sawiin Governor chuan, Local Level Task Force ten hma lain mipui mamawh an pe chhuak thin tih a sawi a. COVID-19 hrileng a darh zel loh nan mi 2000 chuang chu thuawih takin In lamah an in Home Quarantine a. Hetih lai hian India ram pawna zin chhuak mi pakhatin COVID-19 a vei tih hmuhchhuah a ni a. Tunah hian tha takin enkawl mek a ni, a ti.
Governor chuan Mizoram awmna hmun a kilkhawr deuh vangin harsatna thenkhat a awm ve tih pawh sawiin, chung zinga mamawh langsar zual deuh chu COVID-19 Testing Laboratory, Medical Equipments, PPE leh Mask te a ni tih a sawi a. “He harsatna min sutkian pui turin Central Sawrkar ka ngen nghal bawk a ni,” a ti bawk.

Comments

Popular News (Last 30 Days)