Latest News

Ramri venhim hna uluk zawka thawk turin chah

Tunlai-a Novel Coronavirus hrileng mek karah khauh zawka ramri venhim a nih theihna tur chungchang sawihona chu nimin khan Chief Minister, Zoramthanga hovin neih a ni.
Chief Minister Office Cabinet Meeting Room-a he sawihona hunah hian Home Minister, Lalchamliana, Chief Secretary Lalnunmawia Chuaungo leh Additional Chief Secretary, JC Ramthanga te bakah Home Department, Assam Rifles leh BSF hotute bakah sawrkar Official pawimawh dangte telin Chief Minister chuan Assam Rifles leh BSF hotute chu Mizoram Police leh Village Level Task Force te leh tlawmngai pawl dangte nen thawhhona tha tak an neih a pawimawh thu sawiin, tuna kan hun tawn mek hi hun pangngai ang a nih loh avangin nidang-a an thawh dan baka hma an lak a tul thu a sawi a. Chief Minister chuan tuna khawvela hrileng mek laka kan him tlan theihna turin theihtawp kan chhuah vek thu sawiin, Mizoram hualtu ram leh State hrang hrangah he hri leng vei an awm vek tawh avangin mipui him tlan zawk nan ramri vil hna hi khauh leh uluk zawka kan thawh a ngai tak meuh tih a sawi a. Myanmar-ah pawh COVID-19 vei hmuhchhuah belh zel a nih avangin lo luh emaw, chhuah ruk tum emaw an awm loh nan ngawrh lehzuala ramri hrulah hian duty a pawimawh thu a sawi bawk.
He hunah hian Assam Rifles leh BSF chuan ramri hrula an duty dan report pe in, hrilen hnu a hma an lo lak tawh dan te ngaihthlak a ni bawk.

Comments

Popular News (Last 30 Days)