COVID-19 laka Mizoram a himna tura ramri dep-a sawrkar hmalakna te MZP ten an enfiah

Mizo Zirlai Pawl (MZP) General Hqrs. hruaitute chuan nimin khan an President, B. Vanlaltana hovin Mizoram leh Tripura/Assam ramri dep hmun thenkhat tlawhin COVID-19 laka Mizoram himna tura sawrkar hmalakna te an enfiah a. Henglai hmun-a duty te mamawh an thlen te chu ngaihsaka hma lak sak thuai turin sawrkar thuneitute chu an ngen bawk.

MZP General Hqrs. hruaitute hian COVID-19 hrileng laka kan ram a himna tura Mizoram leh Tripura/Assam ramri dep (Sensitive area) a awm Zawlnuam, Luimawi leh Kanhmun Duty post hrang hrang te tlawhin, Duty-te hmalakna leh Mizoram himna tura sawrkar hmalakna te a hmunah an enfiah tih sawiin, he hripui laka Mizoram kan himna tur hian Mizoram ramri dep hmun hrang hrangah Village Level Task Force (VLTF) ten Duty Post siamin rim takin luidung leh hmun remchang laiah venhim hna an thawk mek tih an sawi a. Mizoram khawthlang lama duty VLTF hruaitute chuan he hrileng dona kalpui mekah hian Force duty an duhkhawp loh thu leh sawrkar-a an dil tawh a chhanna an hmuh har thu an sawi tih MZP hruaitute chuan sawiin, rikrum thilah a tul huna hman theihtur Ambulance pawh dil tawh niin pek an la ni lo nia an lo sawi thu an sawi a. Mihring lut chhuak endikna tur hmanrua leh a invenna, Personal Protective Equipment (PPE) tam zawk leh tha zawk ramri hrul (Sensitive Area) a dah turte, Medical duty tha zawk an mamawh thute MZP hruaitute hnenah hian an lo sawi bawk a ni.
MZP chuan COVID-19 hrileng laka Mizo mipuite kan him theih nan ramri hrula Duty Post awm te hneh taka vil turin sawrkar chu an ngen tih sawiin, Duty ten an mamawh an thlen te ngaihsaka a tul anga hmalak sak thuai thin turin sawrkar thuneitute a ngen nghal bawk a ni. Nimin a heng hmun an tlawhna ah hian MZP hruaitute hi Kolasib, Zawlnuam, Kawrtethawveng leh Bai-rabi-a MZP hruaitu ten an lo tawiawm a ni.
MZP chuan National Lockdown kalpui anih avanga Mizoram pawna Zirlai leh hna-thawka tangkhang mek te chu an hre reng tih sawiin, hemi chungchangah hian theihtawp an chhuah zel thu an sawi a, rampawn-a tangkhang mek te chu sawrkar thuchhuah ngaichanga dawhthei taka sawrkar hmalakna lo nghak hram hram turin an ngen bawk.

Comments

Chhiar Hlawhte