Ramri ven kawngah nasa zawka hmala turin ngen

Mamit District Thalai Pawl hruaitute chuan nimin khan Mamit District Level Task Force Chairman leh Mamit DC, Dr. Lalrozama chu hmuin ramri venhim kawngah tun aia nasa zawka hma la turin an ngen.

Mamit District Thalai Pawl hruaitute chuan an DC hnenah hian tunlaia khaw-velin a buaipui em em, COVID-19 chu vanduai palhin mi pakhatin kan kai tihloh chu Mizoram kan him zel nia an hriat thu leh tun din hmuna he hri hlauhawm tak laka Mizoram kan him zel theih nan sawrkar chu Ramri venhim kawngah tun aia nasa zawka hma la turin an ngen a. A bikin, Mamit District chu International Boundary (Bangla-desh) te, Tripura State leh Assam State ramri ten a hual vel avangin Mamit District mipuite leh Mizoram mipuite he hri laka kan him zel theih nan te, ramri venhim kawngah ruahmanna felfai leh him leh tha kan neih zel theih nan, 'Mamit District Border Area Study Group on COVID-19' chu din vat turin Sawrkar chu an ngen bawk.

Hei bakah hian thenawm State-a he hri leng avangin Mizoram-a rawn luh tum te dang turin Tripura leh Assam State ramri-ah te Local Task Force te pawh nileng leh zankhua-a an duty thu Bawrhsap hnenah hian sawiin, Border Village Level Task Force-ten Duty post an siam hmun thenkhata Force/Armed Police te indaihlo taka an awm chu pawi an tih thu an sawi bawk a. Sawrkar chu IR emaw, Armed Police emaw a tam thei ang ber dah belh tura ngenin, Police duty zingah ruihhlo ngai man tur an awm chu van-duaithlak an tih thu leh tun hnuah hetiang hi thleng tawhlo se an duh thu MDTP chuan an sawi bawk.

MDTP chuan CM's Relief Fund atanga Mamit District intuamhlawm nana Sawrkarin Rs. 18,60,000/- a sanction chu lawmawm an tih thu leh Mamit District pachhiat zia hriatpuia hei hi ennawn leh tur leh Mamit District tana CM Special Package ruahman sak turin Mizoram sawrkar chu an ngen bawk a ni.