Mizoram-ah April thla chhung Lockdown kalpui chhunzawm a ni leh dawn

Mizoram-a COVID-19 darh zel tur venna atana Lockdown kalpui mek chungchang sawihona leh inrawnkhawmna chu nimin khan Aizawl-a Assembly Annexe Conference Hall-a neih niin Chief Minister, Zoramthanga chuan Mizoram-a inkhar-khipna kalpui mek chu April thla tawp thleng kalpui chhunzawm zel a nih tur thu a sawi.

Mizoram-a inkharkhipna kalpui mek chungchang sawihona nimin a neih ah hian Chief Minister, Zoramthanga chuan Mizoram-a inkharkhipna kalpui mek chu April thla tawp thleng kalpui chhunzawm zel a nih tur thu hi sawiin, International leh Inter-State border ven hna a aia khirh lehzualin kalpui a nih tur thu a sawi a. Hetih rual hian mipui tan harsatna lutuk a thlen loh nan State Level Task Force in District Level, Village/Local Level Task Force te leh mi pawimawh dangte nen inrawn chung zelin remruatna a siam ang tih a sawi bawk. Chief Minister chuan Mizoram sawrkar chuan India hmarchhak State hrang hranga Mizoram mi leh sa tangkhang mekte chu Mizoram-a hruai haw dan tur sa ngaihtuah dawn tih sawiin, Thlawhna leh Train service-te a chawlh \huap avangin India ram hmun hla zawka tangkhangte erawh hruai haw theih an ni rih dawn lova, ramchhung hmun hrang hranga Mizoram House-a innghatte chu an ei man leh riah mante \hin an ni dawn lo tih a sawi bawk.
He hunah hian Home Minister, Lalchamliana chuan ramri danpin hna an thawh dan te, ngawrh lehzuala hmalak an tum dan a sawi a. Supply Minister, K. Lalrinliana pawhin inkharkhipna kalpui a nih chhunga ei leh bar kan tlakchham loh nan te, mi rethei ten ei leh bar a thlawna an dawn theih dan tur ruahmanna kal mek leh hmachhawp te a tarlang a. I&PR leh Rural Development changtu Minister, Lalruatkima chuan ni 100 inhlawhna a taka thawh theih ni rihlo mahse mipuiin hun engemawchen atana ni 100 inhlawhna an sum lak lawk dan tur ruahmanna an siam te leh I&PR kaltlanga COVID-19 chungchanga thuthar leh sawrkar hmalakna te englai pawha puanzar a nih dan a sawi bawk.
Meeting a tel dangte hian hmalakna tura an ngaihdan leh rawtna te sawiin, inkharkhipna la chhunzawm zel chu tha an ti tlang hle a, chutih rualin nitina inhlawhfa thin te leh rethei tak tak, nitin-a eichawp thawkchhuak thinte harsatna hriatpuiin, a tihziaawm dan tur sawrkarin ngaih-tuah se an ti a. Rampawna tangkhang mekte tanpui dan pawh sawrkarin ngaihtuah se tiin Meeting-ah hian an sawi a ni.
Sawihona ah hian Village Level leh Local Level Task Force chungchang pawh sawi chhuah niin COVID-19 vanga duty a chhuak te inpekna fakawm an tih thu te, a bikin ramri a duty te indaihlohna phuhruk dan turte, sum leh pai-a intanpui dan turah ruahmanna mumal zawk kalpui ngaia an hriat thu te, ramri-a duty a bikin Myanmar leh Mizoram inrina a duty mek Assam Riffles duty te chu tualchhung mite tan thawhpui an harsat thu te tarlan a ni a. Inter-State ramri dep-a Police duty dahbelh rawtna te pawh sawi a ni bawk.
Hei bakah hian Partial Lock down leh Complete Lock down chungchang hun engemaw an sawiho hnuah Inrawnkhawmna kaihhruaitu Chief Minister chuan kalkhawm ten an duh ang leh kan ram-in a la mamawh avangin Total Lock down chu tun April thla chhung atan pawhsei a nih thu a sawi a ni. 
Hemi hma nimin zing khan Mizoram sawr-kar-a Council of Ministers chu CM Cabinet Meeting Room-ah thukhawmin Lockdown kalpui mek leh a nghawngte an thlirho a. Minister rual kalkhawmte pawh hian Mizoram mipuite himna turin Lockdown ti tawp rih lova kalpui chhunzawm tha an ti tlang a. Khirh lehzual zawka ramri venhim te, tangkhangte chung-chang thu te, inkharkhip vanga harsatna tawk mi retheite dinhmun pawh meeting-ah hian sawilan a ni bawk.

Comments

Chhiar Hlawhte