Lunglei-ah SEDP-Maize tlangzarh a ni

Mizoram sawrkar Flagship Programme, SEDP hnuaia Vaimin chin beihpui thlakna Scheme, SEDP-Maize chu nimin khan Lunglei High Power Committee (HPC) Vice Chairman, Lawmawma Tochhawng MLA chuan a tlangzarh.
Lunglei District Agriculture Office kawt zawl-a SEDP-Maize tlangzarhna hunah hian HPC Vice Chairman chuan kuthnathawktute hmakhua ngaia an tan ruahmanna tha tak siam saktu Agriculture leh Horticulture Department-te chungah lawmthu sawiin, inkharkhip chhungin District mipuiten thlai thar tlachham miah lova hnianghnar taka an ei thei chu kuthnathawktute thawhrim rah a ni tih a sawi a, kuthnathawktute hlut zia mitinin kan hriat thar leh theuh a tul hle a ni, a ti bawk.
SEDP-Maize hnuaiah hian Agriculture Department chuan Vaimim chin beihpui a thlak dawn a. Vaimim tharte hi ran chaw atana hman tur niin sawrkarin a hralhna a buaipui nghal dawn bawk a ni. SEDP-Maize hnuaiah hian Lunglei District chhungah Vaimim chinna tur khaw 18-ah Cluster 19 ruahman niin ram zau zawng hi a vaiin Acre 475 a ni a, kuthna-thawktute mi 619 an tel dawn a ni. Vaimim ching tura thlan te hian acre khat ah a chi kg. 6 zel an dawng dawn a. A chi bakah hian tanpuina hrang hrang – Plant protection chemicals, sprayer, a phoro-na leh transportation subsidy te an dawng bawk ang. Cluster tinah hian Farmer Interest Group (FIG) din tawh niin FIG tinah hian Maize Sheller (vaimin mal thlakna khawl) leh sawngbawlna (Post Harvest Activity) atan tanpuina Rs.10,000/- theuh pek a ni dawn a ni.
He hunah hian HPC Lunglei, Agriculture Department leh Horticulture Department-te tangkawp hmalaknaa kuthnathawktute hnena thlai chi tlawm zawk (subsidized rate)-a pekchhuah ruahmanna chu tlangzarh nghal a ni a, Thlai chi tlawm (Subsidized seeds) hi Horticulture Department Refrigerated Van hmangin Aizawl atanga lak mek niin naktuk, April 15 atangin Lunglei DAO Office leh DHO Office-ah te lei theihin a awm dawn a. Thingtlang khua te tan ruahmanna hranpa siam sak niin Lunglei District huamchhunga Agriculture Circle Office 10 leh Horticulture Circle Office 8-ah te in report tur a ni a, Circle Officer-te hian an area theuhah an lo sem chhuak ve leh dawn a ni.

Comments

Chhiar Hlawhte