Eirawngbawlna Gas-ah harsatna a awmlo; PMUY hnuaiah a thlawnin Gas sem mek a ni

MIZOFED Serchhip Branch-a thawk te chuan mipuite tan eirawngbawlna Gas ah harsatna liantham thleng a awmloh thu sawiin, PMUY hnuaia eirawngbawlna Gas Connection nei te hnenah Gas man tur chu an thun mek thu an sawi.
MIZOFED Serchhip Branch-ah thawk te chuan tunlai-a rampum-a COVID-19 avanga Lock down kalpui mek avangin eirawngbawlna Gas lakluhna kawngah harsatna liantham tawh an neihloh thu leh dan pangngaiin mipuite hnenah eirawngbawlna Gas hi semchhuah reng a nih thu an sawi a, nimin pawh khan eirawngbawlna Gas hi Trip thum (3) rawn thleng lehin heng te hi Serchhip khawchhunga an sem hmabak, Ser-chhip Bazar Veng leh Serchhip Chhim Veng bakah Keitum khua ah te an sem nghal thu an sawi bawk.
MIZOFED Serchhip Branch-a thawk te chuan nimin-a eirawngbawlna Gas rawn thleng te hi tunlai hri leng laka fimkhurna atana tih thiang-hlim a nih hnuah mipuite hnenah sem tura phurh-chhuah chauh a nih thu an sawi a, heng Truck te hi niminpiah khan Borkhola (Assam) atanga rawn phurh niin nimin zing-a Serchhip an rawn thlen hman avang hian kawnglak ah tih khawtlai nia a lan loh thu an sawi a, hei vang hian fimkhur thu-ah eirawngbawlna Gas Cylinder rawn thleng leh a phurtu Motor te hi Chlorine/Sodium Hypochlorite hmanga tih thianghlim hmasak hnuah mipui hnenah semchhuah chauh a nih thu sawiin, Chlorine/Sodium Hypochlorite hi PHE Department ten ngaihtuah sakin Fire Department ten an Motor hmangin an kah sak tih an sawi bawk.
MIZOFED Serchhip Branch-a thawk te chuan sawrkar laipui ruahmanna anga thla thum (3) chhung eirawngbawlna Gas a thlawna dawng thei tur, Pradhan Mantri Ujjwala Yojana (PMUY) hnuaia Connection nei mi 550 vel an hnuaiah an awm thu sawiin, heng mite hnenah hian an Gas man tur hi thun mek a nih thu leh Bank account felloh avanga pawisa la lut theilo pawh engemaw zat an awm thu an sawi a. A thlawna Gas dawng turte hian SMS/Online hmanga Gas an booked a ngaih thu leh hamthatna dawng thei tur te hian an dawn ngei theih nan hmalak zel a nh thu an sawi a. Hemi kawnga harsatna nei leh zawhfiah duh nei te chuan MIZOFED Office-ah emaw, District Consumer Association hruaitute hnenah emaw zawhfiah theih a ni.

Comments

Chhiar Hlawhte