ZPM Legislature Party in COVID-19 dona atana sum hman dan chu uluk takin chhui zel an tum

ZPM Legislature Party Leader leh Serchhip bialtu MLA, Lalduhoma chuan COVID-19 dona atana sum hman dan chu uluk takin an chhui zel dawn tih sawiin, thil diklo a awm chuan an hnena hriattir zel turin a chah a. He hun kan tawn mek hian tumna a awm chuan kawng a awm tih min kawhhmuh niin a sawi bawk.

Nimin, April 11, 2020-a mipuite hnena thuchah a tihchhuah ah ZPM Legislature Party Leader, Lalduhoma chuan khawvel pum huapa thihna in thla a zar laiin, Zoram chhung leh pawna cheng Zofaten Pathian zahngaihna kan la dawn zel avanga Pathian chungah lawmthu sawiin, Health Minister Dr. R.Lalthangliana inpekna leh thawhrimnaah ah pawh lawmthu a sawi a. Tunlaia COVID-19 dona atana Mizoram in kan sum hmuhna lian ber chu Central sawrkar a ni lo theilo tih sawiin, India sawrkar chuan hemi atan hian cheng vbc. 170,000 pechhuakin Mizoram pawhin cheng vbc. 23 kan dawn ve thu leh hei hian nasa taka min chhawk thu a sawi a. PM-KISAN hnuaiah Rs. 2000 theuh an Account-a thun turin Farmer 40,890 tan Rs. 8,17,80,000/- min pek thu te, Chhungkaw harsa zualte tan thla thum (3) chhung buhfai a thlawna sem tura ruahman a nih thu te, Ujjawala Scheme hnuaiah Gas Cylinder a thlawna pek tura ruahman a nih thu leh Labour in-register ten Rs. 3000/- theuh Workers Welfare Fund atangin an dawn dawn bakah Ni za inhlawhna pawh a rate tihsan a nih bakah Job Card neitute hnena pek tur cheng nuai 16,818.7 ruahman a ni bawk tih a sawi.

Hei bakah hian Lalduhoma chuan India COVID-19 Emergency Response and Health System Preparedness Package siam thar a nih thu leh heng Medical equipment leh Diognostic equipment chi hrang hrang – PPE te, Mask te, Ventilator te, Testing Kit leh damdawi leina te chu Central-in min tumsak vek dawn thu sawiin, Isolation Room siamna tur te, ICU siamna tur te, Laboratory dinna tur te, Sample buaipuina senso te leh thawktu lakbelhna turte pawh min tumsak vek dawn tih sawiin, “He hun denchhen hian tuna kan mamawh leh nakina kan la mamawh zel turte chu Central Sawrkar senso a kan neih theih lai hian neih tuma kan phet vat vat a tul hle,” a ti bawk.

ZPM Legislature Party Leader chuan he hri leng dona atana sum hmanna kimchang hriat ni lo mah se sawrkar thuchhuak atanga an hriat theih chinah a vaiin Rs. 6,56,53,000/- pekchhuah tawh a nih thu leh kan sum neih atanga chhutin pekchhuah hi a la tlem hle tih a sawi a. Local Level atanga District Level Task Force te pual hian a vaiin Rs. 4,42,38,000 pek a ni tawh thu leh Local Task Force te hnena lut erawh ala tlem hle nia a lan thu pawh sawiin, “Level tina Task Force te kut-a sum lut zat hi langtlang taka kalpui kan phut a ni,” a ti bawk.

Hetianga Lock Down kalpui hian zirlai hlu tak min pek thu leh thil tih theihloh nia kan ngaihte min tih tir thu pawh sawiin Lalduhoma chuan, “Reilote chhungin Laboratory te, Cold Storage te kan nei ta mai a. He hun hian Social Force kan la neih thatzia te, Mipui ten Discipline kan la neih thatzia te, kaihruaitu tha erawh kan mamawh zia te min hriattir,” a ti a. AH& Vety Department chuan ran chaw, Sa leh Sangha etc. kan nghei loh dan tur, Lailen Consultancy nena tangrualin an ruahman thu leh Agriculture Minister pawhin Farmers Helpline siamin, Sugarcane Grower Association nen ruahmanna tha tak an siam thu sawiin, he hun hian thil thar a rawn hrchhuahpui niin a sawi bawk.

ZLP Leader chuan he hun hian tumna a awm chuan kawng a awm tih min kawhhmuh tih pawh sawiin, “Vegetable Supply Chain te lo piangin, a duh phawt chuan Sawrkar hi kharchhawngtu ah a tang thei tih min hrilh a. Farmer te hlutzia leh an dinhmun derthawn si zia te min hmuhtir a. Fur-ah chauh ni lovin Thal-ah pawh kan intodelh thei tih te kan hriat phah ta bawk,” tiin System mumal zawk nena chhunzawm turin a rawt bawk.