P&E Minister in a bial chhung khaw hrang hranga VLTF te hnenah sum leh hmanrua a sem

Power & Electricity Minister leh Tawi bialtu MLA, R. Lalzirliana chuan nimin khan a bial chhunga khaw hrang hrang tlawhin Village Level Task Force (VLTF) te hnenah chhawmdawlna sum leh kut tihfaina (hand sanitizer) te a pe a; Health/Clinic Centre leh Sub-Centre hrang hrangte mamawh Medical equipment te a ken sak bawk.
P&E Minister R. Lalzirliana hian nimin a bial chhung khaw hrang hrang a tlawhna ah hian Mualpheng tlawh hmasa berin, chawhma lamah Maite, |awizo, Ruallung, Rulchawm, Keifang leh Saitual a tlawh a, Chawhnu lamah Thingsul, Thingsul Tlangnuam, Seling leh Tuikhurhlu te a tlawh leh bawk a. Heng khaw hrang hrang a tlawhna ah hian Village Level Task Force te chu Sawrkar thuchhuak ngaichang chung zel leh fimkhur taka ruahmanna siam thin turin a chah a; mi chhuanchham, ei leh bara harsatna tawk an awm chuan a theih anga anga puih zel a tum thu leh a rang thei ang bera amah hriattir zel turin a chah bawk. Ram pumah lockdown hi kalpui mek a nih mek rualin thlai chi thlak hunlai a ni tih sawiin Minister chuan, mahni khaw ram chin-a lo neia eizawng ten ei leh bara harsatna an tawh zel loh nan an lo/huan an enkawl a tulna chen a awm avangin a tul anga ngun taka ngaihtuahpui tur leh, harsatna an tawh lohna tura fimkhur tak chunga ruahmanna siamsak turin VLFT te hi a chah bawk.
P&E Minister chuan COVID-19 leng mek chu a damdawi ala awm theih loh avangin lockdown a zawh hunah pawh a bial chhung mipui te chu engemaw chen an fimkhur chhunzawm zel rih a la ngai dawn tih sawiin, awlsam taka inkaichhawn theih a nih miau avangin mahni chauh inngaihtuah lova, khua leh ram himna tur dah pawimawh hmasa tur leh dawhthei tak leh thu awih taka kan him tlan theihna atana sawrkar thuchhuak zawm zel turin mipuite chu a chah bawk.
Tawi bialtu MLA, R. Lalzirliana hmalakna hian March ni 31, 2020 khan Saitual (VC-I, Venglai VC, VC- III), Keifang, Seling, Thingsul-Tlangnuam leh Thingsulthliah Village Level Task Force-te hnenah Kut tihfaina (hand sanitizer), kutkawr (hand gloves) leh hmai tuamna (mask) engemawzat pek an ni tawh a. April ni 2, 2020 khan Tawi bial chhung khaw hrang hranga a mamawh te hnen a sem turin - Buhfai bag 50, Dal bag 9, Alu bag 30 leh Purunsen bag 20 chu khaw hrang hranga Village Level Task Force-te hnenah hlan a ni bawk. Heng bakah hian April ni 9, 2020 khan Face Mask a thui tur puanthan (cotton) pawh Rulchawm tan metre 9, Mualpheng tan metre 6, Seling tan metre 15, Thingsul-Tlangnuam tan metre 10, Thingsulthliah tan metre 19 bakah Hand Sanitizer leh Mask te chu VLTF te tan pek a lo ni tawh bawk a. Heng a thil pek tawh zawng zawng hi Rs. 2,35,000/- hu nia chhut a ni.

Comments

Chhiar Hlawhte